Ka Shillong Lajong FC ka la khmih lynti ba kan ioh ia ka jingjop hynne ka sngi ka 18 Risaw 2025 ha ka jingiakhun pyrshah ïa ka Nangkiew Irat SC na ka bynta ba kin bat biang ia ka nam lahduh jong kane ka lympung Shillong Premier league (SPL), hynrei namar ka jingiakhaid bor, ka jingiakhun ka la kut noh da ka jingiasam mar shi poiñ ha kaba baroh ar kynhun ki khlem ioh ban thep kol haduh ban da kut ka minit ïalehkai.
Ia ka jingiaid lynti jong ka Lajong kaba dei ka lahduh jong kane ka lympung ha ka aiom ba lah dep, la pynkut noh da ka jingtbit jong ki rangialehkai ka Nangkiew Irat kaba dei ruh ka kynhun ba khlain bad kiew sted mynta u snem.
Ka Lajong mynta ka don ha ka Kyrdan ba 2 (19 point) na 9 sien ki jingiakhun katba ka Langsning kaba la bat ia ka Kyrdan ba 1 ka la ioh ban kamai 20 point.
Ia ka nam lahduh jong kane ka lympung yn rai ha ka sngi nyngkong (20.10.2025), kata ha ka jingiakhun hapdeng ka Mawlai SC pyrshah ia ka Rangdajied United FC. Ka Mawlai ka donkam ban ioh ia ka jingjop namar ka Langsning kaba la tam lypa 2 point bad lada jia ba ka Mawlai ka iakhaid ha ka sngi nyngkong, ka Langsning kan ioh ban rah ia ka nam lahduh mynta ka aiom.
