Ki nongpyniaid jong ka All India Footbal Association (AIFF) bad Eastern Command of the Indian Armed Forces ki la rai bad mynjur sa shisien ban ailad biang sa shi wat na ka bynta ban pynlong biang katto katne ki jingialehkai ha kane ka jylla hadien ba ka aiom ialehkai ba lah dep, katta na ka bynta u snem 2024-25 ka la long kaba seisoh ha kane ka Jylla.
Ha une u snem ba lah dep, ka Jylla ka la ioh ia ka kabu ha ka sien ba nyngkong ban pdiang (host) ia kane ka lympung phutbol ba la rim tam ha ka dewbah Asia ha kaba ka Shillong Lajong bad ka Rangdajied United ki la don bynta ha katei ka samoi ba lah dep.
Ka AIFF ka la pynbna ba ia kane ka lympung yn sdang ha ka 22 tarik Naitung 2025 bad yn pynkut ha ka 23 Nailar 2025 ha kaba ka North East United FC kaba dei ka lahduh jong kane ka lympung kan ioh ban sdang ia ka jingialehkai.
Kane ka samoi kan ialehkai kan pher khyndiat na ka samoi ba lah dep namar ka AIFF ka la mynjur ban pynlong ia kane ka lympung ha 5 tylli ki Jylla kynthup ha Vivekananda Yuba Bharati Krirangan, Kolkata, Kishore Bharti Krirangan, Kolkata, RD Tata Sports Complex, Jamshedpur lane Morhabadi Stadium, Ranchi, Khuman Lampak Stadium, Imphal, Jawahar Lal Nehru Stadium, Shillong bad ha SAI Stadium, Kokrajhar.