Hadien ka jingwanrah burom ia ka Jylla da ka jingkhur takma ha ka lympung National Games kaba 38 ia kaba la pynlong ha ka jylla Uttarakhand, u District Sports Officer (DSO) ka Ri-Bhoi District, Bah Bobby L. Nongbet, Joint Secretary ka MSOA Bah Pynbiang Laloo, Bah Ksankupar Warjri (Treasure MSOA), Bah Dipshon Ryntathiang (Executive Member MSOA) lem bad ki Kmie kpa, ki paralok ki la leit ban pdiang burom da ka jingkmen ia kitei ki Nongjop na kad liengsuiñ Guwahati kum ka dak ban pynpaw ia ka jingkmen bad burom ia ka jinglah jong ki ban khur takma ha katei ka lympung kaba heh.
Kitei ki Nongjop takma ki kynthup ia u samla Pynshngaiñ Kurbah, Vikash Rana, Indra Sharma, Elizabeth Vincent, Kiran Devi, bad N.Anandbhi.
Katto katne ki nongialehkai ka jylla ki dang don mynta ha Uttarakhand ban bteng ia kane ka jingiakob da ka thong ban bteng ruh ia ka jingkhur takma na ka bynta ka jylla. Ia kane ka lympung kaba la sdang naduh ka 28 tarik Kyllalyngkot yn pynkut ha ka 14 tarik mynta u bnai.
