Ka samla Olivia Dkhar na ka shnong Khahnar kaba hap hapoh ka EJHD ka la ïoh ban wanrah ia ka nam bad ia ka burom ha ka jylla Meghalaya katta ha ka lympung ialehkai ïakhun kti ne ka Arm Wrestling ha ka National Arm Wrestling bad ka Para Arm Wrestling Championship 2025 kaba la pynlong da ka Kerela Arm Wrestling Association, mynnin ka sngi ka 9 tarik u bnai Naitung 2025 ka samla Olivia Dkhar ka la ïoh ban wan poi sha ka jylla ha ryngkat ki ar tylli ki takma ksiar bad kawei ka takma rupa.
Haba ioh ban ia kren bad ka samla Olivia ha ka shnong Shohshrieh kaba hap hapoh ka EJHD ha kaba na ka liang ka sein kur Dkhar EJHD ka la ïoh ban pdiang burom ia ka, ka la ong ba kane ka jingiakhun ka jong ka, ka dei ha ka National Level ha kaba ha ka Youth ka la ïoh ar tylli ki Gold medal bad ha ka Senior pat ka la ïoh ïa ka Silver medal.
Shuh shuh ka Olivia ka la ong ba mynta ka la shah jied pat ban ïakhun ha ka International Level katta ha ka ri Bulgaria bad ha por ba ka dang ioh ban rung hapoh rel ka la ïoh biang sa ia kawei pat ka khubor katta ban ïakhun ha ka PPL ka Pro Panja League ha kaba kan sa ïakhun ha ka 5 tarik u bnai August 2025.
Na ka liang ka sein kur dkhar la wan ban pdiang ia ka olivia da U Bah Besterwell dkhar – GS ka Sein Kur Dkhar EJHD Unit, U Bah Shaniah Skem Dkhar – Vice President ka Sein kur Dkhar EJHD U Bah Kyrshan Dkhar – GS ka Wapung Circle bad u Bah Francis Dkhar – Vice President ka Wapung circle.
Na ka liang ka sein kur Dkhar ka la kit bok kit rwiang ia ka Olivia ba ka dang lah ban ïaid sha khmat ha kane ka lynti ka jong ka bad ba kan sa poi sha ka thong ha ka jingiakhun ka jong ka bad ba kane kan long ruh ka nuksa ia kiwei ki khun samla ba kin bud lang ia ka lynti iaid jong ka Olivia khnang ban wanrah biang ia ka nam ka burom ha ka kur bad ha ka jylla hi baroh kawei.
