Ki nongialehkai ka Meghalaya Association of Kick boxing Organization (MAKO) mynta ka sngi ka 25 tarik Naiwieng 2025 ki la wanrah nam ia ka jylla hadien ba ki la khur haduh 45 tylli ki takma ba kynthup ia 31 tylli ki Gold Medal, 7 tylli ki Silver bad 7 tylli ki Bronze ha ka jingialehkai National Kick boxing Championship kaba la long ha Pune, Maharashtra.
Ki khynnah ialehkai ka jylla kiba la leit iashimbynta sha katei ka jingialehkai ki don haduh 12 ngut kynthup ia 5 ngut ki kynthei bad 7 ngut ki shynrang.
Ki 12 ngut ki khynnah ialehkai ka jylla kiba la wanrah burom ia ka jylla ki kynthup ia ka Lorenzo Songthiang, Riwodmiki lyngdoh, Chemi Nongpluh, Sany Khyriemmujat, Jyntialin Warbah, Espiranza S Songthiang, Wanbhaki Suchiang, Josesaiah Hynniewta, Kyrshanbor R Songthiang, Deilang Ryngkhlem, Nokris Dkhar, Francis RR Songthiang bad Coach Dony R Ranee.
Na ka liang ki nongialehkai haba ai jingkren sha ki lad pathai khubor hadien ba la wan phai sha nongbah Shillong ki la pynpaw ka jingsngewnguh ia u Blei ba kila ioh ia ka jingjop ha kane ka jingialehkai National KickBoxing Championship, ka burom sha ki kmie ki kpa kiba la kyrshan borbah ia ki khynnah ialehkai ban ioh leit iashim bynta sha Pune watla kim ioh kano kano ka jingiarap na ka Sorkar bad kumjuh ia ka Meghalaya Association of KickBoxing Organization khamtam ia u Coach ba la iarap ia ki khynnah ialehkai ban poi sha ka thong ka jingjop.
