Ka Shillong Lajong FC bad ka Mawlai Sports Club kin iaknieh ia ka nam lahduh jong ka Shillong Premier league 2024.
Haba kren sha ki lad pathai khubor na ka liang u Bah Dipshon Lyngdoh Nongbri General Secretary SSA u la ong, ka Shillong Sports Association ka la pyndep ia ka jingialehkai Shillong Premier League haduh 89 tylli ki jingiakhun bad lashai ka sngi kan dei ka jingiakhun kaba 90 bad kin iaknieh syndon ban ioh rah ia ka nam lahduh jong ka Shillong Premier league 2024 hapdeng ka Shillong Lajong FC bad ka Mawlai SC, ka ban long lashai ka sngi ha SSA Football Ground ha ka Por 5:30 janmiet.
Shuh shuh u la pyntip kiba ioh ban rah ia nam lahduh kin ioh ia ka song pisa kaba 6 lak tyngka bad ka kynhun kaba wan ba ar kan ioh ia ka song pisa kaba 3 lak tyngka. U la wer ia baroh ki paidbah nongkyrshan kiba ieid ia ka football ba kin wan sakhi ia kane ka jingialehkai Final lashai ka sngi ha SSA Football Ground Polo.
U la ai khublei ia ka sorkar hapoh ka jingialam jong u Conrad K Sangma kum u Myntri Rangbah ka Jylla kaba la iarap ia ka Shillong Sports Association na ka bynta ban kyntiew ia ka football ym tang ha shillong hynrei ha ka Jylla baroh kawei.
Na ka liang ki nongpyniaid jong kine ki ar tylli ki kynhun ka Shillong Lajong FC bad ka Mawlai Sports Club ki pynpaw ba ki la long kiba la pynkhreh ban ïakhun tyngeh ban iaknieh ia ka nam lahduh jong ka Shillong Premier league 2024.