Ka lympung ialehkai District Level Inter-School Subroto Mukherjee Cup 2025 ia kaba la pynlong da ka ophis jong ka District Sports Officer, East Jaintia Hills District kaba la sdang naduh ka 4 tarik mynta u bnai bad poi noh sha kaba kut mynta ka sngi ha madan ialehkai Deinshynrum Football Ground, East Jaintia Hills District.
Ha kane ka sngi pynhap pyrda la wan ban sakhi da ka MDC jong ka Rymbai-Khliehriat ka kong Violet Lyngdoh, ha ka jingiadonlang u Additional Superintendent of Police, East Jaintia Hills District, u ma S. Paslein, ka District Sports Officer, East Jaintia Hills District, kong Stephanie M. Rasang, ki School Principal, ki nonghikai bad ki khynnah skul bad kiwei kiwei.
Ha ka jingiakhun Final jong Under-15 Boys ka Musniang Secondary School ka la long ka lah duh da kaba pynliem ia ka KB Memorial Secondary School, Wapung da 3-0 kol. Ha ka Under-17 Boys ka Wapung Higher Secondary School ka la pynliem ia ka Sein Jait Tuber Higher Secondary School da 4-0 kol. Katba ha ka Under-17 Girls Category ka Lotus Secondary School, Deinshynrum ka la pynliem ia ka Sanshnong Secondary School by 2-0 kol lyngba ka tie breaker.
Ia ki khusnam sha ki champion bad Runners-up, kumjuh sha ki rang bad thei ialehkai kiba la ioh ia ka nam Best Player. Ia ka nam Best Player ha ka U-15 Boys la ioh da u Everlasting Dkhar na ka Musniang Secondary School, ha ka U-17 Boys la ioh da u Daemitri Rymbai jong ka Sein Jait Tuber Higher Secondary School bad ha ka U-17 Girls la ioh rah da ka Thehlut Sana na ka skul Sanshnong Secondary School.
Ki lai tylli ki skul kiba long ki lahduh kin mihkhmat ia ka East Jaintia Hills District sha ka State Level Inter-School Subroto Cup 2025 ka ban sa long ha Shillong.
