[Da u samla Wallam Lamin Gadew, Huroi]
La Jan ka samoi jied ia ki Nongthaw Aiñ shapoh ka ïing Dorbar thaw Aiñ ka Jylla, hato donkam ban bishar bniah shwa ban jied? ne ka bha ia ngi ba ngin shu ia jied bieit khlem ka Nongrim bad ban jied tang ia kiba lah ban thied da ka pisa?
Ka kput ngi dei ban don bad ban pyni nangne shakhmat khnang ba ngin lah ban pynduh jait noh ia ki Nongthaw Aiñ ki ba leh kamkai ia ki mat ki jura jong ka jaitbynriew bad ki ba shu im sngi tang ban thiah sngi bad trei arsap, bamsap ia ka hok u paitbah ka jylla hapoh Secretariat baroh San snem. Ka por ka la dei eh ia ngi ba ngin ia pyrkhat jylliew shwa ba ngin ñion ia ka vote bad ban ai ka muhor ha ki, ba ki long ki Nongsynshar.
Ngim dei ban shu klet bieit ia kaei kaba ngi la shah shitom ha kine ki snem ba la leit, ka jingshah iuhroit, jingshah tyllep ki paradoh parasnam jong ngi ha kine ki snem ba lah leit ka long haduh katta katta, ha ki Aiñ ki ba khyllah khyllah khamtam ka jingthmu jong ki nongsynshar jong ngi, ban pynduh jait noh ia ka jaitbynriew Khasi Jong ngi.
Kapor kam dei shuh ia ngi ba ngin jngi sah ia ki Duriaw barit, hynrei ka por ka la dei eh ia ngi ba ngin jngi noh lyngba ia ki Duriaw baheh, khnang ba ki nongsynshar jong ngi kin kheiñ burom bad ba kin sngap lang ia ka sur jong ngi u paitbah.
Tylli ngin ieng, saphret ngin kyllon. Phi kwah ban im! ia tylli mlon.