[Da u, Chandame Sungoh, Chutwakhu Jowai]
Ki khon toh ki soh ïong ka jingmaïa ka bei wa u pa, man leh ki nongkynti wa e U Blai ha ka chongkha chongman ka manïung man sem. Ki khon toh ki nongrap pateiñ ïaka ïung ka sem, ka khih ka khan , man ki nong ri nongsumar iaka bei u pa haki sngi ki rta i man heh man tymmen ïong ki. Wym em moolynnai wym em ksiar em rupa lane wym em spah em hajar warap kor rap sarot ban ïaki khon . Wympher lada chong ha trep ha skum lada bam i ja wei bluh wym em iwa pynkmen palat iaka bei u pa hawa ïoo ki wa kmen wa rkhai ki khon. Wym em leh ki manbei man pa wa kynshieñ wa salia wa ïoosih ïaki khon , lait noh kitu kiwa mihsang mih khyllah kiwa em mynsien ksuid mynsien soitan wow pynhap jubor lane wow ieh wow noh ïeikhon la jong.
Ialeh i u khih chitom kreh chitom u thooh lad thooh luti u chah slap chah sngi nei wynta wow dap wow biang wow suk wow saiñ ki khon . Wym em leh ki manbei man pa kiwa kwah waki khon ïong ki u sah ki hei dum hei beij hei chitom hei jynjar , han lada kabei u pa man ki ki bru kiwa beij wa them leh kat haki khon ïong ki tea kwah ki u man kiwa tip wa stad. . Katda kamtea kam wada ong haneiñ tea han lada ha pyrdi i dooh i duk leh ïaleh chitom u thooh lad thooh luti wow pynlai skur ïaki deiwa rap toh rap biang.
Hakani ka jingthoh lane ka artikle i wa chon khia o u ong toh ïaki manbei man pa kiwa chong wa sah cha ki thaw nongkyndong kiwa phah skur phah purea ïaki khon ïong ki cha sor. Lane wat kitu kiwa sah sor hi ai leh kiwa phah wan chakiwi ki sor kam ka nuksa kiwa na Jowai tea phah cha Shillong kiwa na Shillong tea ohah cha Kolkata Bangalore Delhi Mumbai wa cha kiwi kiwi. Kwah u ku ki khon cha khmat haka purea puthi u man ki ki wa nang wa stad katwa ki skur wa em cha nongkyndong wan du ki skur wymrap wym hoi katda kamtea ki bei ki pa wym lait sa u phah skur phah purea ïaki khon cha sor . Ha o chasor tip hi i waki khynnah stad ki chalak ki man smart ki kamwa ong ki phareng tang wym toh wan u myllieñ i ïakani kawi ka jingsakhiat , ” Heiwon wa em i bha heitea em lang i sih ” Ki khynnah kiwa dang chiphaw khad-ar snem kiwa dang purea class ynru ynñiaw kiwa dang toh sap u ïoh ïei sneiñ wa kyrpang ka bei u pa ha ïung ha sem da dup ki u em chajngai naki man i iwi i jingsih pynman ïaki wow leh jngai leh kiar ki naka bei u pa, wow tlot wow chongper noh itea i ïajuh ïajan ha pyrdi ïong ki. Neini mih i lehmon leh ngait katwa chong i kwah ki neibhah wym em de kiwa ïoo wa pait kiwa klam wa ong wa sneiñ wa kroo. Boonsien i lehmon lehngait iong i hi wymjooh ïah jooh lam ki cheiwa bha kamtea tea poi cheiwa sih .
I leh waki bru mynda wan ki na nongkyndong cha sor smat ki u chem ïaki lok kiwa sih ? Ki bru wabha wa em burom em akor chong ki khlop tdop nea jar i ïung i sem pait ki leh ki jar jar la i kamram wxm jooh mih wxm jooh uiñ sarok ki khlem kaam. Neitea i daw ikiwa dang wan thymme cha sor eh ki ki u chem u tip mit . Kitu kiwa im miet im sngi cha ïaw cha hat (lait nakiwa em kam ) u uiñ sarok tea toh kiwa vkhlem kam kiwa sih kamwa ong kitea ki khynnah kynjat sla. Kiwa na nongkyndong hawa poi chasor nyngkong tea cha ïaw cha hat hi u uiñ u lai kamtea smat u chem daki lok kiwa sih chwa .
I wa rap ma chooh chooh toh ïakitu ki khynnah kiwa khadynru khadynñiaw haduh arphaw snem rta wa ong ki teenager . Hakini ki rta i pyrkhat pyrdaiñ ïong ki man i iwa chat wa keiñ kam ka lyear langthari. I bor wabha wei bor wasih mih mih wan wan ki khlem sangeh ha i jingmut jingpyrkhat . I snam wa dang iñ dang chit i pyrkhat pyrdaiñ wadang lung wym ïe ki u ksoh skem ieimut ïei pyrkhat wow dam u pait u ïoo u ap u sniaw lane u ngait ïaki yi ki yi kiwa chaad ha soodong ïong ki kamtea boonsien jooh shem i ki khynnah hakini ki rta jooh hap ki chei bakla Ka imlang sahlang man ko kam ka phlim kawa em i bha cha lyndet i sih, wan pachu ko kam ka um dait haka um iñ Ki khynnah kiwa dang hakini hi ki snem ki rta eh bha u ïoo u chynna lane u jied u ksoh ieiwa bha wa em cha lyndet tea kyntaid ïeitai I sih iwa em ha khmat . Kamtea tea ur tea hap chei dih biri dih sikret dih beer dih kyiad dih bhang dih drugs , tuh lute , kusbi dakaid..
Iwi iwa pynma pynsih chooh chooh haka pyrthai katni toh nei roi smat ka science wa technology ki Tablets Mobile Phone internet wa social media. Jan waroh ki khynnah kiwa khadsoo khadsan snem chaneiñ du kiwa da ïoh bait hi u ksoh smart phone. Ha o wym ïe u len em hi chiboon i bha wa ioh i naki Mobile , iarap ki hawa kheiñ jingkheiñ , hawa khreh kot wa kiwi kiwi de ki jingmyntoi . Toh u tip wan i em leh boonjait i sih haki Mobile, ioh ki u ialeh Facebook, Massenger , Whataap , Instagram wow ia send wow iatext kut jait i sih i sang . Ki khynnah kiwa khadsoo khadsan snem kiwa purea class viii class ix chiïaw chiïaw khlem thiah ïa phone lok ïa phone chan haduh wada kylla wei por thiah por chong por bam por dih . Hei thaw wow khreh kot da lut por lut sngi hei ïatext , pait phlim , upload Facebook , upload status , leh games wakiwi kiwi kiwa dangrap ma chooh chooh .
Katda kamtea da ini i jingthoh da kyntu ïaki manbei man pa waroh ham sniaw sarong ham sniawtoh sniaw biang wa ïoh phi u pynlai skur cha sor cha ki skur wa miat . Kynmoo mynda sih da i jinglong akor tea waroh i jait dasih lut. Ham ïaboon kam du hei lai khih lai kreh lane hei kam hei jam cha chnong tea ïeh ki khon chawa ngait hi cha sor , ïaleh chitom wow wan ïoo wan pait ïaki la-nger la-nger khnang wow tip kammon man ki. Ia samboi pathan u man kamwa ong ki , ” Kabei u pa wa booh ki khon wa bam pxngngam ” Khublei chiboon !