[By Lamare Lyngdoh, via e-mail]
Kumba ngi la iohi ha ki khubor ba la pynmih ha ki bnai ba la dep ba ka Synjuk Dorbar Shnong Jowai ki la lah ban pynbeit bad pyntip paidbah (social awareness) ha kaba iadei bad ka dor bad ka bai kit bai bah ia ki tyndong gas (LPG cylinder). Kum u nongshong shnong hapoh ri Loom Jaiñtia nga sngew ba ka por ka la dei ruh ia ki waheh shnong jong ki shnong na nongkyndong ban iaphylliew jingmut bad aiti noh ha u DC (Supply) bad Transport Authority ban pynbeit ia ka dor bai kit bai bah ia ki tyndong gas sha ki thaiñ nongkyndong khnang ba kan ym ktah ia ki paidbah khamtam kiba duk ba rangli. Haba ia ka dor bai kali (passenger/commercial vehicle) lah ban buh da ka District Administration bad Transport Authority nga sngew ba kane ruh ka dei ka kamram jong ka District Administration ban pyrkhat lang na ka bynta ki paitbah noyngkyndong khnang ban kin ym shah khniot palat ha ki riew shim kabu.
Kumban shu pynkynmaw ba ka bai kali lane bai kit bai bah (transport or delivery charge) kaba dei T. 19.50 ka la shah ot lypa ha ka invoice. Kito kiba leit shim ia ki cylinder dalade hi na ki kudam (godown) jong ki Distributor (Agency) kim dei shuh ban siew ia kane ka bai kit hynrei ki la dei ban ioh ia ka rebate price. Ha kajuh ka por kito kiba kwah ban thied gas thymmai (register new LPG connection) ruh ki lah ban apply bad siew online noh khnang ban ym shah khniot ha ki LPG Distributor/ Agency.