Ïa ka khun tipsngi ki briew la kha ha Umtyrtah, ha kawei ka ïingtrep Phlang ka barit kaba don halor u Lum uba itynnat ïa uba ki khot u “Lum Mootyng-ngi” uba don hajan ka shnong Lumpliah, wat la ka iingtrep ka barit pynban ka kper kaba heh bad kaba iarbha. Ha ka por ba kha ia ka khun tisngi ki briew, ka kmie jong ka ka Yoowanka bad u Yoowanphi, ki la kynjoh sha ka 45 snem bad 55 snem ka rta. Ka la long ka jingkmen ka bakhraw ia kine ki arngut shitymmen ha ka jingim jong ki ba ki la ioh ia ka khun tipsngi ki briew ba kan mihkhmat salan ia ki bad ki da hun hi jrut ba ki la ioh da I khun kynthei kaba long ka jait ka kynja, ka nongiohpateng bad ka ban mihpli ia ki lashai lashisngi.
Wat la u Yoowanphi bad ka Yoowanka, ki long ki briew kiba duk, hynrei ha ka sngi nohmynsoo (pyrtuid boo) lane ha ka sngi jer kyrteng kum ka dak ka jingkmen ki la khot la wer ia ki kur ki jait, ki kha ki man bad ki lok ki jor ban wan bam khawai ha iing jong ki. Ha kane ka sngi ba pynlong ia ka jingkhawai, naduh dangstep ki marjan iing jansem ki la ia bun kam ha ka otdoh, otjhur, ka shet ka tiew, ka sait ka khlieng bad ban pynbiang lut nadong shadong ia ka jingdonkam jong ki nongwan bam khawai ha kane ka sngi khawai Nohmynsoo.
U Yoowanphi bad ka Yoowanka, ki long ki briew kiba im ha ka rep ka riang bad ki long ruh ki briew kiba minot bha ha ki kam ki duk. Ha kane ka kper kaba heh bad kaba iar lah ban shem ia ki jyngthung ba har rukom ia kaba ki thung ki tep ha ki Aiom bapher bapher kum u Kubi, Phulkubi, Wangshriew, Presbean (Presbin), Wangiong, Wangphyrni, Sohbaingon, Wangmoo, Sohsaw, Sohmynken, Sohkhia, u Jangew, u Jathang, ka Lapuwi, ka Iarem, u Iaiang, ka Iamahek, u Piat, u Jyllang, u Rynsun, Tohtari, Salaphiah, u Jamerdoh, u Phan, u Dhania, u Motor bad kiwei de ki jaitjhur ba bun jait.
Ha kane ka kper ki thung ruh ia ki soh ki ralam ki jait pa ki jait, kum u Sohphan (Sohshram) Sohpieng, Sohtaintli, Sohlane, Sohpyrdong, Sohsaniriang, Sohsakhne, Sohsakhlain, Sohniamtra, Sohsalong, Sohsarmat, Sohlyngngi, Sohsynle, Sohli-ia, Sohiong, Sohbluh, Sohshang, Sohsuit, Sohsaludong, Sohbrab, Sohthylliang, Sohaitladkhur, Sohsatat, Sohlasarmi, Sohbah bad kiwei de ki jaitsoh. Nalor ki Soh ki Ralam don bun jait ki jaitdieng kiba long ki ki Diengkper jong kane ka kper, kum ki diengsning, diengbti, Dienglakhar, ki Siej, ki Skhen bad kiwei de ki jaitdieng kiba phuh syntiew, ki tiewdieng ba har-rukom bad ki syntiewkhlaw ba bun jait kiba khring ia ki Ngap ba bun jait ban wan kjit um syntiew.
Ka jingdon ki Diengsoh kiba har-rukom bad ki syntiew ki skut kiba laiphewjait laiphersker, ki khring ia ki Thabalieh ba bunjait, ia ki Ngap ba bunjait kum u Luwai, u Ripiang, ki Syondieng, Syonkhyndew, ki Luwe sangia, ki Dkhi, ki Dkhaw, ki Ngapriang, ki Rasluin, Ngap-ia-liur, Ngap thiahsngi, Ngapsla, Ngap Synhen, Ngap khlong bad kiwei de ki jaitngap bad ki Thapbalieh ba bun rong hala ki jait ki jait, kiba wankjit Umbang, Umthiang na ki Tiewdieng bad na ki syntiew ki skut kiba don ha kane ka kper.
Ki Nongiaid lynti kiba dei iaid na kane ka Kper kim banse ban sangeh shiphang arphang ban peitkai ia kane ka kper bad kiba kit jingkit ban shongthait pynjah jrem shipor arpor lane shikyntien kwai ban peitkai ia ka jingitynnat kane ka kper bad ban peitkai ia ki Thapbalieh ba bunrong bad ia ki Ngap kiba laiphewjait kiba wanher na shatei na shathie na sha mihngi, na sha sepngi kiba wan kjit Umbang Umthiang na ki Syntiew ki Skut jong kane ka kper bad kiba suhkylla pat sha la ki Sympa.
Ia ka Khun Tipsngi ki briew la kha hamar basdang kynrong ka sngi. Ka long ka khynnah kaba la kha bhasngi, kaba bhabriew kaba kat ka jingbhabriew kaba la palatliam ka jingbha briew ia kiwei pat ki para-khynnah kiba ha ka rta jong ka.Ka dur ka dar la kumba oh, ka sniehdoh kaba saw hoin hoin la kum u Sohlyngngi uba la ihbha, ka khmut, ka khmat kaba wandur wandar rymmuin, u sniuh uba lamrongstem rongksiar, ki kti ki kjat kiba dapdoh, ki khmat kiba phyrnai, ka khmut kaba wandur itynnat la kumba sniah da u Paintali, ki rmiangshyntur kiba stang kiba lamrongksiar la kumba tah lipstic. Ki shynpriah kti, shympriahkjat ki long kiba wandur wander bha, ka rynieng, ryniot kaba jrong, ki bniat kiba nilieh itynnat. Ki briew kiba iohi ia ka, ki iaroh ia ka jingbha briew jong ka. Katba nangmih ka sngi katta ruh ka jingbha briew jong ka ka la nangjur bad nangwandur arshah.
Kumba la kha bha sngi ia ka, kumta ruh naduh dang khynnah ka long ka khynnah kaba pher bak-ly-bak na kiwei pat ki para khynnah bad katba ka nangheh nangsan ka la nangpynjanai shuh shuh ialade ha ka akor, ka burom, ha ka kren, ka khana, ha ka riam ka beit, ha ka ktien ka thylliej bad ha ka kohnguh sneng iala ki kmie ki kpa. Naduh dangrit kam ju kylliang ktien wat shisien ruh ia ki kmie ki kpa lane iamai iania bad la ki para khynnah ne bad ki marjan marpa. Ki lok ki jor, ki marjan iing marjan sem ki sakhi ia kane bad ki ju ong ba kim ju iohsngew wat tang shikyntien ba kan kren eh kren khor bad kren khlem akor ia ki lok ki jor, ki marjan iing marjansem, ia ki kur ia ki jait, ia ki kha ia ki man bad ia ki nongleit nongwan kiba dei iaid lynti na jan kane ka kper jong ki.
Ka wan na ka lomngiing longsem kaba duk, hynrei ka longiing longsem kaba donburom, kaba tipbriew tipblei kaba kylluid bad kaba bha mynsiem. Naduh ba ka sdang tipbriew ka la hap ban peit bad sumar ia ka iing ka sem. Hateng hateng haba wan donkam ki briew ia I Mei I Pa jong ka, wat la kim lah ban iakynduh ia ki, ka Khun tipsngi ki briew, ha ka rta kaba dangrit ka pynshah skhor biang biang ia ka jingdonkam jong ki. Haba ia kren bad ki ka kren da thew bad ia ka jingkren jong ki ka da pynshongnia kaei kaba dei bad kaei kaba lait. Ka long ka khynnah kaba pariah ktien hynrei haba ka ia kren bad ki briew, ka kren suki jai bad kam ju pakhet ktien haba dangkren kiwei.
Ki Nongleit Nongwan, kiba wan pan um ban dih pynjah sliang ia ka jingsliang jong ki, ka Khun tipsngi ki briew ka ai ia ki thik thik katba ki kwah, kam ju khnium, hynrei baroborda ka khmat ka bakhuid bad kaba phuhsamrakhie bad basbun mynsiem ka pynpaw ha ki. Ha khmat jong ka ym don kiba duk ym don kiba riewspah, ym don kiba khraw ym don kiba poh ym don kiba lehkhuid ym don kiba lehtngit, ha ka hi baroh ki long kiba ia ryngkat kyrdan. Kane ka jinglong bym niew shiliangkhmat bad babha jong ka, ka tapkhlup bad ka pynlong ia ki briew baroh kiba leit kiba wan ban ieid kylliang ia ka bad iaipyrto sah ia ka jinglong babha jong ka. Ka Khun tipsngi ki briew nalor ba ka long kaba bhabriew, kaba tipsngi, sa ka akor kaba bha, ki briew kiba dei iaid lynti narud ka iing bad ka kper jong ka ( Khun tip sngi ki briew) haba ki iohi ia ka kim lah khlem da kyrtiangdien bad peit ieid ia ka. Kito pat kiba la ia kynduhkam bad ka, kim lah khlem da iaroh “ Ah! Ka Khun tipsngi ki briew”.