U Myntri ka Tnad Food Civil Supplies and Consumer Affairs, u Bah Comingone Ymbon, u la kyntait ba ka don ka jingkiewdor ia ki marbam mardih ha ka Jylla, da ka ba kdew ruh ba ka jingmih madan ka Voice of People Party ban iakhih tang ban ioh jingmyntoi namar ba la jan ka MDC Election.
Lah ban kdew hangne ba ka Voice of People Party (VPP) mynta ka sngi ka 13 Tarik Nailur 2024 , ka la pynlong da ka jingiakhih shongkyllaiñ myngngor ha Madan Malki ban pynpaw ka jingpyrshah halor ka jingbym shimkhia ka Sorkar ban tehlakam ia ka jingkiewdor ki marbam mardih ha ka Jylla.
Haba kren sha ki ladpathai khubor, u Bah Comingone Ymbon, u la ong halor ka jingkynnoh ba don ka jingkiewdor ki marbam mardih ka dei ka bym don ka jingshisha, namar haba ia nujor ia ki dor jong ki marbam mardih ha kiwei ki Jylla bad ha ka Jylla Meghalaya ki long kumjuh.
” Halor ka jingkynnoh ba don ka jingkiew dor ki mar bam mardih ha ka Jylla kam dei ka ba shisha namar katkum ka kaiphot kaba la ioh na ka Tnad ki ba peitngor halor kane ka mat , kam shym la lap ba don kano Kano ka jingkiewdor ha ka Jylla” u la ong .
U la bynrap “Ka Sorkar ka la lum ia ki dor ki mur ki ba ianujor ha ka Jylla Meghalaya bad kiwei pat ki Jylla, bad ka dor ka ia ryngkat bad ka lah ban don ka jingiapher, lait tang kaba tam tang 1 tyngka 2 tyngka”.
U la ong shuh shuh ba ha ka Jylla hi ki marbam ki ba kiew ki dei tang ha u jhur bad ka doh bad kane ka dei namar ba ka Jylla ka dang hap ban shaniah na kiwei ki Jylla .
Lada ka don ka jingkiewdor ha ki jhur bad ka doh ka dei na ki ba bun ki daw, kawei na kane ka long namar ba ym don ki rel ki ba wanrah ia ki marbam mardih , namar ka don ka jingiapher ha ka dor lada wanrah ia ki mar ki mata lyngba ka rel ne lyngba ki truck .
Kawei ka daw kaba wanrah ia ka jingkiewdor ha Nongbah Shillong ka dei hadien ka jingkhang ka Sorkar ia ki trok kiba wanrah mar ki matta ban iaid lyngba na ka jingkieng dam .
” Ka jingkhang jong ka Sorkar ban iaid ki kali kit marbam ban iaid na jingkieng dam ka dei ka wei ka daw namar kumba long mynta ka lynti ka la jngai namar ba kin hap iaid na Mawryngkneng ban poi sha Shillong kumta ka dor ka la dang kiew, hynrei na ka liang ka Tnad ka ju pynlong ia ka jingjurip halor ka jingkiew dor ki mar ki Matta ha ka Jylla bad kumba ka long mynta kam shym la don kano kano ka jingkiewdor palat ” u la bynrap .