U MDC ka 18-Jowai North u ma Awhai Andrew Shullai uba dei u nongïalam ka liang pyrshah hapoh ka JHADC haba ai jingkren ha ka Dorbar (Special Session) ula ong ‘lada khlem don kiba ïakhih ka sorkar kam kyndit bynriew’ hynrei mynta ka sngi ka Executive Committee ka JHADC kala wanrah ïa ka Resolution ban dawa na ka President ka Ri ban pynkylla ïa ki kyndon aiñ bapher bapher kiba ïadei bad ka kam tih dewïong.
Ula ong ha u 2015 ka sorkar jylla kala pass ïa ka Resolution ban phah sha ka sorkar India ban pyntreikam ïa ki kyndon aiñ ha kaba ïadei bad u dewïong, haduh u snem 2018 kila mih shibun ki jingïalap Election bad kular ban pyllait ïa u dewïong, hynrei ha u snem 2019 wan poi ka shithi na ka sorkar kmie ba kam lah ban pdiang hynrei ka sorkar jylla ka khlem buddien bad ïakhun pynbeit ïa kane ka kyndon.
‘Haba la poi ka jingïap bad ka jinghiar ka ïoh ka kot na ka jingkhang tih dewïong’ ka sorkar kala sdang ban shimkhia mynta, hynrei kumba paw mynta lada ka sorkar ka kwah shisha ban pyllait ïa ka jingtih dewïong ka lah ban leh ïa kane namar wat na ka liang kiba bun ki myntri jong ka sorkar pdeng kila wan poi man ka por sha kane ka jylla.
Ka por kala dawa ban pyrkhat thymmai ym tang haba la poi ka por Election MP, kum ka liang pyrshah hapoh JHADC ka kyrshan pura ïa kane ka Resolution bala wanrah da ka EC ka JHADC, ‘lada plie plie lang ïa baroh bad lada khang khang lang ïa baroh ym dei ban leh shilliang’, ong u ma Shullai.
Shuh shuh ula ong kaba sngew phylla balei ïa kane ka Resolution la wan rah kyrkieh ïa ka ha miet ïakren khlem da ai por shwa ban jurip bniah ïa ka, namar wat ïa ki kompani heh la shah ban tih dewñong kane ka paw kiba nabar ruh ki lad ban wan trei shapoh kane thaiñ.
Ula kyntu ïa kane ka Resolution kaba la monjur mynta ka sngi dei ban buddien ïa ka haduh ban kan treikam bad kam dei ban long tang ka jingpynbeit paidbah kumba long haka sorkar jylla, ula kyntu ruh ban pynbeit ïa ka rukom bhah ïa ka khajna (royalty) kaba la poi haduh 60 percent sha ki trai jaka ne ki shnong hapoh kane ka aiñ. Ula pynsngew ruh wat ki Company Cement mynta kila ïoh ka bor ban tih mawshun dalade bad maki hi kiba khaïi ïa u Mawshum kane kala buh jingma shi katdei eh.