Sdang ka jingshong Dorbar Synrai ka Meghalaya Assembly mynta ka sngi
Ka jingshong Dorbar Synrai jong ka Meghalaya Legislative Assembly ka la sdang naduh mynta ka sngi (24/08/2026) bad la buh ba kan kut haduh ka sngi Thohdieng mynta ka taiew (28/08/2026). Ia ka Dorbar la pyniaid da u Shongknor ka ïing Dorbar Thawaiñ ka Jylla u Thomas A Sangma.
Ha kane ka jingshong Dorbar la iakren ruh halor ka jingjia jong ka jingiakhih ka KSU, ha kaba u Myntri Rangbah ka Jylla u Conrad K Sangma ha ba kren hapoh ïing Dorbar ha ka 24 tarik Nailar 2026 u la pyntip halor ka jingjia kaba la jia ha ka 19 tarik Nailar 2026 ka la don ka jingiaid rally da ki ar-shaka ba la pynlong da ka Seng KSU bad ka jingai jingbit u Deputy Commissioner ka East Khasi Hills ha kaba ka ka mih ka jingjia shah kawang maw ki kali Assam bad ka jingshah pynjulor ki kali bad kumjuh ka jingshah shoh ki briew ha lynti iaid ha ka por ba pynlong ka KSU ia ka jingiaid Rally arshaka ha Nongbah Shillong ha katei ka sngi.
Hadien ka miet jong ka 19 tarik Nailar 2026 lah kem noh ia u President ka KSU, u Vice President bad kumjuh u General Secretary ka KSU ha ki kyndon aiñ bapher bapher jong ka BNSS bad kumjuh ka jingpynkheiñ ia ka Meghalaya Maintenance of Public Order Act.
Shuh shuh u la ong ba haduh 15 tylli ki FIR la register halor ka jingjia kaba la jia ha ka 19 tarik Nailar 2026 bad u la iathuh ba ki don San ngut kiba la ithuh durkhmat halor ka jingjia ha ka 19 tarik Nailar 2026 bad la ioh ban kem noh u wei bad ka Sorkar ka la thaw ruh ia ka kynhun SIT ban tohkit bad ban lap ia kiba donkti halor ka jingjia ha ka 19 tarik Nailar 2026 bad ia kynhun SIT yn khlieh da u IG Law & Order .
Shuh shuh u Conrad K Sangma u la iathuh ruh halor ka jingiaid beit bad ka shongsuk shongsaiñ hapdeng ka Jylla Meghalaya bad Assam ka la don ka jingiakynduh hapdeng arngut kata na Jylla Meghalaya lah mihkhmat da u Symbud Myntri Rangbah ka Jylla u ma Sniawbhalang Dhar bad na Assam la mihkhmat da u Myntri Sorkar u Atul Borao bad la shim ruh ia ki rai ba kongsan na ka bynta ka shongsuk shongsaiñ hapdeng ka Jylla Meghalaya bad Assam.
U la pyntip ba ha ka 23 tarik Nailar 2026 ka la don ruh ka jingialang ha kaba u Symbud Myntri Rangbah ma Sniawbhalang Dhar u la khot ia ka jingialang ia ki nongniah tourist na ka Jylla bad la shim ruh ia ka sienjam ban weng noh ia ka jingiakhih halor ka jingbym shah ia ki Kali Assam ban wan sha Meghalaya bad kumjuh ia ki Kali Meghalaya ban leit sha Assam bad kumjuh ha u Bnai Nailur kan sa don biang ka jingialang bad ki nongniah tourist ban iakren shuh shuh halor ka jingkynduh jingeh ki nongniah tourist la ong u Myntri Rangbah ka Jylla.