U President ka National People’s Party (NPP) uba dei ruh u Myntri Rangbah ka jylla Meghalaya u Conrad K. Sangma u la pynpaw ia ka jingsngewkhia halor ka jingmihnoh jong u MP barim ka Rajya Sabha u Dr W.R. kharlukhi na ka Party.
U Sangma u la ong ba u Dr Kharlukhi u la shim ia kane ka rai da ka mon ba laitluid jong u.
Haba pynkynmaw ia ka jingiasyllok sain pyrthei kaba la slem u Myntri Rangbah u la ong ba u Dr Kharlukhi u la iatreilang bad u kpa jong u, uba la khlad noh u P.A. Sangma, bad u la noh synniang shibun sha ka jylla.
U la pynkynmaw ruh ba u Dr Kharlukhi kham mynshwa u la kyntait ia ka jingtyrwa na u P.A. Sangma ban long MP Rajya Sabha. Hynrei hadien u Conrad u la pynthikna ïa ka jingshah jied jong u sha ka ïingdorbar ba ha khlieh duh, da kaba ngeit ba u nongïalam saiñpyrthei uba la tbit bha kum ma u, u dei hok ban ïoh ïa ka lad ban mihkhmat ïa ka Jylla Meghalaya ha Parliament.
Haba kylli hato ka jingrisain kan long ka jingpynphaidien ia ka NPP, u Sangma u la jubab ba ki briew kiba iasoh bad mih na ki seng saiñ pyrthei ka dei ka bynta jong ka sain pyrthei.
“Ha ka jinglong shimet, nga sngewsih namar ngam shym poi pyrkhat ba kan jia kumne. Hynrei nga burom bad pdiang ia ka rai jong u Dr. Kharlukhi”, u la ong. U Conrad Sangma u la pynskhem ba ka NPP kan iaid shakhmat bad kan bteng ia ka kam seng jong ka. U la bynrap ruh ba ki nongïalam ka party kin sa ïakren la kin leit sha u Dr Kharlukhi bad kyrpad ïa u ban pyrkhat biang ïa ka rai jong u.