Ha ka 24 tarik u Nailar, 2026, ka Integrated Health Campaign 2026 ka la pyniar ïa ki jingshakri jong ka sha ki bynta bad ki jaka bapher bapher hapoh ka East Jaiñtia Hills District. Mynta ka sngi, kane ka campaign ka la poi sha ka shnong Nongsning, ha kaba ki paidbah nongshong shnong bad ki paidbah kiba ïaid lyngba ka National Highway ki la wan ban shim bynta ha ki jingshakri ka koit ka khiah kiba la pynlong da ki nongpynïaid.
Ki doktor bad ki nongtrei ka tnad ka koit ka khiah ki la don bynta ha kane ka campaign, bad ki la pyndonkam ïa ki tiar bad ki kor sumar kiba donkam ban ai jingshakri ïa ki nongshim bynta.
Haba kren sha ki lad pathai khubor, ka Programme Manager jong ka Mihmyntdu Community Social Welfare Association (MCSWA), ka Smti. Renibeth Patlong, ka la ïathuh ba ka Integrated Health Campaign la sdang da ka MLA jong ka thaiñ, ka Smti. Santa Mary Shylla, ha ka 21 tarik u Naitung, 2026.
Ka la batai ba kane ka campaign ka kynthup ïa ki kam bad ki bynta bapher bapher. Ka Mihmyntdu Community Social Welfare Association ka dei kaba peit ïa ka bynta jong ka extended outreach. Kane ka health campaign ka don por lai bnai ban pyndep haduh 30 tylli ki health camp, bad ka prokram jong mynta ka sngi ka dei ka camp kaba 20.
Ki jingshakri kiba la ai ha kane ka camp ki kynthup ïa ka sam dawai paidbah kiba la pynbiang da ka District Medical and Health Officer (DMHO), East Jaiñtia Hills. Ka ophis jong ka DMHO ka pynkhreh ïa ki dawai bad kiwei kiwei ki tiar kiba donkam na ka bynta ki field camp.
Ka campaign ka ai ruh ïa ka jingtest Random Blood Sugar (RBS), ka jingthew ïa ka Blood Pressure, ka jingtest HIV bad Syphilis, kumjuh ruh ka jingthew ïa ka jingkhia jong ki briew.
Ka Smti. Renibeth Patlong ka la ong ba ka campaign ka la ïoh ïa ka jingkyrshan bad ka jingwan shim bynta kaba bha na ki paidbah ha baroh ki jaka ba la pynlong ïa ki camp. Ka la bynrap ba man ka por ba ki nongpynïaid ki buh ïa ka banner jong ka campaign bad pynkhreh ïa ki tiar kiba donkam, ki paidbah ki la wan shakhmat ban shim bynta.
Katkum ka jingong jong ka, kane ka campaign ka la ïarap ban wanrah ïa ka jingkylla ha ka rukom pyrkhat jong ki paidbah shaphang ka jingtest HIV. Ki paidbah mynta ki la nang duna ka jingsheptieng ban leit test, bad palat 100 ngut ki nongshim bynta ki la wan sha man kawei pa kawei ka health camp.
