Ki nongñiah trok kiba ñiah ïa ki trok jong ki karkhana Cement bad ki Transporter ha East Jaiñtia Hills District, mynta ka sngi ki la ïalum ban pynlong ïa ka jingïakhih kaba jai jai hajan ki katto katne ki ophis transport kiba don ha ka shnong Nongsning, East Jaiñtia Hills District.
Ki nongñiah trok kiba dei ki trai shnong jong ka jylla ki la rah ïa ki placard kiba pynpaw ïa ki jingdawa jong ki, kiba ong, “Ki Nongñiah Trok ki dei ki nongtrei ym ki mraw, burom ïa ki hok jong ki,” bad “Wat bat ïa ka tulop jong ki, ki don ki longïing ban bsa,” nalor kiwei pat ki jingthoh kiba pynpaw ia ki jingdawa jong ki.
Ki nongñiah trok ki la pan ruh ïa ka jingïatreilang na ka MCTODA (Meghalaya Commercial Truck Owner and Driver Association) ha kaba ïadei bad kane ka jingdawa kaba jai jai kaba la long mynta ka sngi nyngkong.
Haba kren sha ki lad pathai khubor, ki nongñiah trok ki la ong ba ka jingïalum jong ki mynta ka sngi ka long ban dawa ia ka kit ka bah na ki cement company bad na ki transporter, Ki nongñiah trok jong ka Star Cement ki la sangeh ban load naduh ka 18 tarik, katba ki nongñiah jong kiwei kiwei ki transport ki la sangeh naduh ka 20 tarik. Ki la ong ba ka daw ba kongsan jong ka jingïakhih ka dei ka jingduna jong ka jingsiew tulop bad ka bai kit ha kawei pa kawei ka trip, kaba la ktah jur ïa ka ïoh ka kot jong ki nongñiah trok. Ki la ong ruh ba ki nongñiah trok na ki thaiñ Khasi, Jaiñtia bad kylleng ka Meghalaya ki la wan lang ban pynpaw ïa ki jingdawa jong ki.
U la ïathuh ba u Deputy Commissioner u la pan por na ki ban ïakren halor kane ka mat, hynrei kane ka jingïakren halor ki jingeh jong ki nongñiah trok ka la jia la arsien. Kane ka la pynlong ïa ki ban ïalum lang mynta ka sngi bad pynpaw ïa ki jingdawa jong ki. Katba na ka liang u Deputy Commissioner un sa khot ïa ka jingïalang ha kane ka sngi Palei ban ïakren halor ki jingdawa jong ki.
