Hadien wada mih wyrta haki kattu katni ki lad pathai khubor boon ki lok ki jor kiwa phone namo kiwa kylli yanga cha phang katu ka wyrta kawa pyrchah ka seiñ All Hynñiewtrep People United Front wow pynkhle biang yakitu ki ticket ka First Frize ki Chiyung Multipurpose Society wa man daka Dumper Truck.
Nei liang yong nga u Chandame Sungoh da kani ka Wyrta da pynche o yaphi kilok kijor waroh wanga ym em bynta o hei yatoh wakani ka wyrta. Ha o , naduh wa seiñ yakani ka seiñ haka 11 tarik u Duiyatra haka snem 2016 nga man o kam u Founder Secretary kani ka seiñ kamwa da yoo phi yaki kattu katni tylli ki kam kiwa daleh o hei pyrtuid kani ka seiñ . Pynban naduh ka snem 2022 chaneiñ neidaw wa khia palat i kaam hei yatoh wa u pud u ang namo ka Border Issue tea ym yoh por de o u em bynta lang hakiwa boon ki kaam kani ka seiñ AHPUF. Da pyllai jingmut o du nei bynta i kaam pud kam ang wei eh i khoo ki paradoh parasnam kiwa chong wasah chaki thaw Khappud wa cha Block -I Block -II kamwa kiwa boon naduh kibru paidbah waki bru sorkar da tip ki yanga hei yatoh wa i ni i kam .
Nga ym beiñ ym pynrem o yei lai luti kiwa yahkhmat kani ka seiñ (AHPUF) hei yatoh weini i kam. Kyntu o leh wow yeiñ ki haka luti ka hok wei sakhiat u pynyoh yeihok kiwa boon walang kiwa dep thied wei dep noh yakitu ki tickets yong ki wymtoh du kat u chna poisa don hi.
Kam u bru samen u wa em i kitkhlieh hei yatoh waka imlang sahlang dap o dei sniawkhia ya kam kini ki jingjia haka imlang sahlang yong i wa dap du i thok i chukor. Jan kat hawa em i khih i kreh kuhea i wow yoh syndet wow mahajon lura lura tea ym kheiñ de i u leh thok leh chukor tea poi chei jah burom chei duh chaniah haka imlang sahlang. Ini pynhiar dor wei pynduh nong i yaka imlang sahlang, naduh ki Officer’s ki Politicians ki Seiñ bhalang ki Societies kamni leh da boon su i leh thok leh chukor i wa ktah yaki paitbah kiwa em hei beij waki kup chiliang ki sem chiliang. Kini kiwa tip wa stad ki emlad em luti hawa seiñ ki yeikhih yei khan yong ki yoo kamwa leh buittuh namo wa plan ki yow thok yow chukor yow lute yei khih kiwa duk waduk don hi, ym em mynsien wei em jingsniaw nei bynta i myntoi yong lang. E jingmut o leh yaki paidbah khamtam kitu kiwa thied ticket rap boon wow dawa hi phi yeihok yong phi ym toh u kut du hei khñium don hi.
Nga tea ym chong hok o u tuklar yeini i kaam neibhah tang kawi ka tickets leh ym em u thied o. Kyntu o leh yaki paidbah kamwa da jooh klam wei da jooh thoh o haki khubor namo ki wyrta wa neini chakhmat tea toh u husiar i u yathied kam kini ki jait tickets neibhah kam kini ki jait toh kiwa suk bha kibru u leh thok leh chukor.