Shi bynta ban pynsngewthuh halor ka jingtreikam ka National Food Security Act (NFSA), 2013, ne ka sien ba nyngkong ‘1st Regional Camp’ on National Food Security Act, 2013 jong ka Khasi Jaiñtia Hills Region la pynlong mynta ka sngi 15 tarik ha Moolibang Community Hall, Shangpung daka ophis u Deputy Commissioner (Supply), West Jaiñtia Hills District.
Ha kane ka sngi la wan ban don lang naduh u myntri sorkar ba peit ïa ka Food Civil Supplies & Consumer Affairs ma Comingone Ymbon, ha ryngkat u Chairman ka State Food Corporation bah P.S. Thangkhiew, u Deputy Commissioner ka West Jaiñtia Hills bah B.S Sohliya, IAS nalor kiwei de.
U ma Comingone Ymbon, haba ai jingkren halor ka jingthmu ban pynlong ïa kane ka 1st Regional camp ka long shi bynta ban ai jingtip sha ki paidbah khamtam ïa kito ki nongïoh myntoi bad ka hok jong ki hapoh ka National Food Security Act, 2013. La ai jingpyntip ruh ïa ki paidbah halor ka jingdonkam ban pynïasoh ïa u Aadhar Cards bad ka Ration Cards. Ula pynsngew ba ka sorkar kan ïaleh katba lah ban pynïoh myntoi ïa ki nongshong shnong baroh hapoh ka NFSA.
Ha ka juh ka por ula kyntu ïa ki nongïalam shnong ba kin peit thuh bha ïa ka rukom pyntrikam ïa ka NFSA khnang ba kan long kaba ïaid beit ïait ryntih khnang ba kan long ka jingmyntio ïa manla ki thliewïing da ka jingïatreilang. Ula kyntu ïa ki nongshong shnong ba kin ujor lada don kino kino ki Vigilance Committee hapoh ki shnong kiba ïaid lait ïa ki rukom treikam da kaba pyntip sha ka Deputy Commissioner lane sha ka tnad Supply khnang ba kan ïoh leh ïa kaba donkam.
Ula pynsngew ha kaba ïadei bad ki ration cards ha kine ki snem bala dep kala don ka jingslem ban sam ïa kiba thymmai na ka daw jong ka khlam COVID-19. Ula pyntikna ba ka sorkar kan pynbeit kloi ïa ka census jong u 2025 kaba dang sah teng.
Kiwei de kiba ai jingkren ki kynthup ïa u P S Thangkhiew, Chiman Meghalaya State Food Commission, u S K War, na ka ophis Food Civil Supplies and Consumers Affairs uba la batai halor ka jingdonkam ban pyntreikam ïa u Aadhar card.
Ula ong kiba kwah ban ujor sha ka tnad Food, Civil Supplies and Consumers Affairs kan long ha une u toll-free number 1967 lane whatsapp +919402327737 ha ki por ba long trei lane lah ruh ban ujor lyngba ka online sha ka Meghalaya Public Grievance Redressal bad ka Monitoring system (megPGRAMS) lyngba ka www.megpgrams.gov.in. ki nongujor kiba ban phah da ka jingthoh, telephone, WhatsApp lane online sha ka District Grievance Redressal Officer (DGO) bad Assistant Grievances Redressal Officer (AGRO).
Na ka liang u Sub-Divisional Officer (SDO) Sadar, East Jaiñtia Hills District u Aditya Verma, IAS, u Assistant Commissioner South West Khasi Hills District, Mawkyrwat bah A L. Bareh, MCS, ka Member Secretary of the Meghalaya State Food Commission kong D M Suja, MCS, u Member Shri. Ravi Gurung, ki nongtrei ophis na kiwei de ki District jong ka Khasi Hills kila wan ban donlang ban ai jingtip sha ki paidbah, la pynsngew kaba donkam ban pynlong ïa ki prokram ai jinghikai ka long shibynta ban ai jingtip ba khambniah sha ki paidbha.
Ha kane ka sngi la pynshai shuh shuh sha ki paidbah lyngba Josephas Thongni lem bad ka kynhun na West Khasi Hills District kiba la ai da ki jingrwai jinghikai shaphang u Aadhar ban pynïasoh bad ka Ration Cards.