Ka Krishi Vigyan Kendra (KVK) West Jaiñtia Hills, mynta ka sngi 5 tarik u Jylliew kaba dei ka sngi ba hynñiew (7) na ka prokram ‘Viksit Krishi Sankalp Abhiyan’ (VKSA) kila bteng ban leit ai jinghikai ïaki nongrep ka District kynthup ïa ki 9 tylli ki shnong hapoh ka Laskeiñ C&RD Block.
Kine ki shnong kiba kynthup ïa ka Mynska, Khlookynrein, Mynkrem, Pasyih, Thadmuthlong, Phramer, Raliang, Pyntei bad Mulum kiba hap hapoh ka Laskeiñ Block West Jaiñtia Hills bad baroh ki nongrep kiba la wan ïashim bynta ki don haduh 998 ngut.
Na ka liang ki dkhot ka KVK kiba leit ban ai jinghikai sha ki nongrep la pynbynta ha ki lai kynhun ka Team-1, Team-2 bad ka Team-3 ha ryngkat ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ïa jinghikai ïa ki nongrep naduh ka rukom rep ïa ki jait soh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de kiba long katkum ka jinghikai jong ka juk stad mynta (technology).
La batai ruh shaphang ki skim bapher bapher jong ki nongrep kiba lah ban ïoh na ka sorkar kum ka PM Kisan Scheme, MIDH Scheme, PDMC, MOVCD-NER, PMFME, Soil Health Card ka PMFBY nalor kiwei de skim kiba lah ban ïoh jingïarap.
