U bah Donwa Dethwelson Lapang (96), Myntri Rangbah barim ka Jylla, uba la ju khot ieit ruh kum u Kpa jong ka Ri Bhoi, u la khlad noh hynnin ka miet 12.09.2025 ha ka por kumba 11:00 mynmiet ei ei, ha ka jingthiah pang jong u ha Bethany Hospital, Shillong.
Khyndiat shaphang ka jingim jong u Bah Lapang; Ia u Bah Lapang la kha ka 10 tarik April 1929, ka kmie jong u ka dei ka kong Elsibon Lapang bad u kpa jong u, u bah Donwa War. U la trei ha kiba bun ki kam, naduh ka kam trei bylla shna surok, ki kam ophis hapoh ka sokar Assam, kum u nonghikai bad haduh ba un da long u Sub-Inspector of Schools, u la thoh ruh bun tylli ki kot.
U bah Lapang u la iathoh shongkurim bad ka kong Amethyst Lynda Jomes Blah ha u snem 1958 bad kila don ar ngut ki khun.
Ha u snem 1972 ula rung sha ka kam saiñ pyrthei bad ula long u MLA na Nongpoh Constituency kum u Independent Candidate. U la ju bat ia ka shuki Myntri Rangbah ka jylla haduh san sien. U long ruh u Myntri Rangbah ba San jong ka Jylla.
U bah Lapang hadien ba u la jop kum u kyrtong shimet, hynrei hadien ula leit ban pyniasoh ialade bad ka party Congress bad u la neh slem slem hapoh kane ka party. Dei ha u snem 2018 hadien ba mih ki kynrum kynram ula hap ban iehnoh ia ka Congress bad leit pyniasoh bad ka NPP bad long syndon u nongaibuit jong ka sorkar jylla hapoh ka jingialam jong u Myntri Rangbah ka Jylla u Conrad K. Sangma. Ha u bnai Risaw 2024 u bah Lapang ule iehnoh ia kane ka kam.
U bah Lapang ula ioh ruh ia ki khusnam bapher bapher bad ula ioh ruh ia ka Doctorate of Divinity, u long ruh u nongseng jong ka Ribhoi Student Union. State Basketball Association, Meghalaya Editors and Publishers’ Association (MEPA) bad ruh u nongseng ia ka Ribhoi College, nalor shibun kiwei de ki kam pynroi ba u la leh ha ka iamlang ka sahlang, ka District bad ha ka Jylla hi baroh kawei.
Ka jingpyndep niam ba khadduh ia u bah Lapang kan long ha ka 15.09.2025 ha ïingsah jong u ha Lower Lachumiere, Shillong ka ban sdang naduh ka por 10:00 AM da ka Balang Presbyterian Jaiaw. Ia ka met jong u yn sa leit rah sha madan Student field, Jaiaw na ka bynta ban pyndep ia ka State Funeral Ceremony.
