Ka President jong ka Meghalaya Pradesh Mahila Congress ka Kong Joplyn S. Shylla ka pynpaw ka jingpyrshah kaba jur ïa ka rai jong ka Sorkar Jylla ban pynkylla ïa ka khajna halor ka kiad kane ka rai jong ka Sorkar Meghalaya ka lah ban pynshlur shuh shuh ïa ka jing dih kyiad ia ki Shynrang bad Kynthei.
“Kane ka jingai lad ka sorkar ban kham pyn bun ia ki nong dih kyiad ha ka jylla jong ngi ka long kaba sngewsih bad ka lah ban wanrah shibun ki jingeh ha ka imlang sahlang jong ngi” ong ka kong Joplyn.
Ka jingbym salia jong ka sorkar ban wanrah ïa kum kane ka rai kan pynkha shibun ki ïing ki sem ba dap da ka jingbym shong suk shong saiñ bad bun ki longïing kin sa pra.
Kane ka jing thmu jong ka sorkar kan ktah shikatdei ïa ki khynnah bad ki hep barit kiba hap ban im ha ki jaka ba dap tang da ki jingkulmar ka lah ruh ban pynlong ïa ki ba kin ïaid ha ka lynti kaba bakla bad kane ruh kan nang pynkhlaiñ shuh shuh ïa ka dih drugs ki khynnah samla kaba la nang kiew ha ka jylla ka jong ngi.
Ka Meghalaya Pradesh Mahila Congress ka kyntu jur ïa ka Sorkar Jylla ban pyrkhat biang halor kane ka rai bad ban buh ha khmat duh ïa ka bha ka miat jong ki longïing longsem, ka roi ka par jong ki khynnah samla ki heprit, ki longkpa ki longkmie bad ban khmih kham bha ïa ka imlang ka sahlang hapoh ka jylla Meghalaya.
Pynkut ka khubor ba la phah da ka kong Joplyn S Shylla, President, Meghalaya Pradesh Mahila Congress.
