Ka Joint Action Committee na Jaiñtia Hills, kaba kynthup ia ka East Jaintia Hills Truck Owner & Transporter Association (EJHTOTA) bad ka Jaintia Hills Truck Owners Association (JHTOA), lyngba une u kyrwoh, ka pynpaw ia ka jingsngewnguh ia ki ar ngut ki Deputy Chief Minister jong ka Meghalaya – U Sñiawbhalang Dhar, ba dei peit ia ka Transport Department bad ruh ia u Prestone Tynsong, ba dei peit ia ka Home Department halor ka jingshim khia jong ki baroh arngut ban pynbeit bad pynkut noh ia ki jingeh kiba la mih myn ha kine ki ar-taiew pura ba la dep, ha kaba ka MCTODA ka la khot da ka jingiakhih pyrshah ia ki kharkhana Dewbilat kiba don ha East Jaintia Hills, da kaba pakhang lynti ia baroh ki trok kit cement bad clinker kiba wan na kitei ki kharkhana, ban pynbor ia kitei ki kharkhana ban pynkiew noh ia ka dor bai kit dewbilat bad clinker bad ruh na ka bynta kiwei kiwei de ki mat jingdawa jong u paidbah trai ri trai muluk ba don trok, ki nongshalan mar bad ki driver, ki mat jingdawa ia kiba ka JAC ruh ka la iai dawa na ka por sha ka por na ki kharkhana dewbilat bad ka sorkar jylla.
KI MAT:
1. Ka Jingslem ban Pyllait ia une u Kyrwoh: U kyrwoh na ka JAC, u la ong ba, ha ka jingshisha, ka JAC ka la thrang bha ban pynlait ia une u kyrwoh jingsngewnguh ia kitei ki ar ngut ki Dy. Chief Minister jong ka jylla, naduh kato hi ka miet 13 tarik, marsynwai ka jingialang jong baroh ki stakeholder, ba la khot pynlong da ka sorkar, ha kaba katei ka jinglang ka la long kaba jop, da ka jingtuklar jong kitei ki ar ngut ki Dy. Chief Minister, hynrei na ki daw ba kyrkieh palat, bym lah shuh ban kiar, jong ki nongialam jong ka JAC, ka khlem ioh shuh ban leh ia kane.
2. Ka Jingsngewnguh: Kumta, lyngba une u kyrwoh, ka JAC, ka pynpaw ia ka jingsngewnguh haduh katta katta ia baroh arngut ki Dy. Chief Minister jong ka Jylla Meghalaya, kata, ia u Sñiawbhalang Dhar, ba peit ia ka Transport Department bad ruh ia u Prestone Tynsong, ba peit ia ka Home Department, namar jong ka jingkitkhlieh bad jingshimkhia jong ki baroh arngut, da kaba khot jingialang noh ia baroh ki stakeholder – ka Meghalaya Truck Owners & Drivers Association (MCTODA), ka East Jaintia Hills Truck Owner & Transporter Association (EJHTOTA), ka Jaintia Hills Truck Owners Association (JHTOA) bad ia ki nongialam jong ki kharkhana dewbilat, kiba don ha East Jaintia Hills District, ha ka 13 tarik mynta u bnai, ha Conference Hall, Main Secretariat, Shillong. Bad ruh ba, ha kane hi ka juh ka jingialang, da ka jingtuklar jong kitei baroh ar ki Dy. Chief Minister jong ngi, la lah ban pynurlong noh shuwa ia ki mat jingdawa ba ha khmat eh jong ki trai ri trai muluk – trai trok, ki nongshalan mar bad ki driver, ha kaba ki cement factory, ki la mynjur ban pynkiew noh ia ka bai kit dewbilat bad clinker sha ka Rs.9/- shi ton, ha ka shi kilometer kynthup ia ka quota jong ki trok. Katba, ia kiwei kiwei pat ki mat jingdawa, kiba dang sahteng, kitei ki cement company, ki la pan por shitaiew ban wanrah pat ia ka rai jong ki ha kawei pat ka jingialang ka ban sa long ha ka 21 tarik mynta hi u bnai.
3. Ka Jingkyrpat & Ka Jingpynkut: Kumta, ha ka jingiadei bad kitei ki mat jingdawa jong u paidbah, trai ri trai muluk, ia kiba ym pat shym la lah ban iakren pynbeit ha katei ka jingialang kaba dang shu dep shen, ka JAC, sa shisien, ka kyrpad biang ia ka sorkar jylla lyngba jong kitei ki ar ngut ki Dy. Chief Minister, ka Meghalaya, ba kin sngewbha ban ieng bad kren biang na ka bynta ka hok bad ka jingmyntoi jong ngi kum ki trai ri trai muluk, ha kane jingialang kaba yn sa khot pynlong biang.
