Ka Organizing Committee jong ka Seiñ Kur Dkhar East Jaintia Hills District ka la iakut ban pynkhalai nusib biang ia ka 2nd Prize jong ka Bumper Lucky Draw, jong ka Seiñ Kur Dkhar East Jaintia Hills District. Ia kane yn sa leh ha ka 5 tarik mynta u bnai, ha VO Office jong ka shnong Mookhep, East Jaintia Hills ha ka por 11:00 baje mynstep.
Kum ban shu kdew hangne ba, ha ka jingshisha, ka SKDEJHD, ka la dep ban pynkhalai nusib ia baroh ki prize jong ka Lucky Draw jong ka, ha ka miet 28 tarik, mynta u bnai, ha ka shnong Mookhep, East Jaintia Hills, ha kaba ka jingpyniakhalai ia kiwei kiwei ki prize ka la iaid beit iaid ryntih, hynrei ia katei ka 2nd Prize pat, ka la don ka jingthut khyndiat ha ka rukom pyniakhalai ia ka, ha kaba ki paidbah nongthied ticket lucky draw, kim hun satia ia kata, bad ki la dawa ba dei ban pyniakhalai biang ia ka sa shisien.
Hooid, wat la ia ka katei ka 2nd prize jong katei ka lucky draw lah don hi ruh ba wan kam, hynrei da kaba sngap, burom bad niewkor ia ka sur, ka jingdawa bad ka jngai jingmut ba dei hok jong ki paidbah, ka Organising Committee jong ka SKDEJHD, na ka bynta ka jingiahun lang jong baroh, ka la iakut ban pynkhalai biang ia ka ha katei ka sngi ba la kdew haneng. Na ka bynta kane, yn sa khot lang ruh ia ki nongthoh khubor bad katto katne ki riew pawkhmat ha ka imlang ka sahlang, lada ki ialait por ban iadonlang ban iasakhilang ha katei ka sngi.
Ha ka jingiadei bad ka jingpynkhalai ia baroh ki prize jong ka lucky draw jong ka Ka SKDEJHD, ka seng kur, ka kwah ban pynshai sha u paidbah baroh ba kam don kano kano ruh ka jingthmu ba sniew bad ka jingleh bym hok ba shalyndet, hynrei la pynleh ia ki baroh da ka jingthmu kaba bha, kaba khuid bad kaba hok, ha khmat u paidbah bad ki nongring video. Hynrei wat la katta ka jingpyrshang ruh, hooid ha ka jinglong briew kan don beit hi ka jingduna hangne hangtai kaba lah ban pynmong, pynsngewsih bad pynbitar ia no re iano kumba la jia mynta.
Kumta, ka SKDEJHD, ka kyrpad ia ki paidbah nongkyrshan, ba kin sngewbha ban ym thew lane ñiew shuh ia ki jingduna jingbakla na ka liang jong ka SKDEJHD ha ka jingpynkhalai ia katei ka prize ha katei ka sien kaba nyngkong, namar ba, ia mynta, da kaba sngap bad burom ia ka sur jong u paidbah, yn sa pynkhalai nusib biang ia ka kat kum ba la kdew haneng.
Ha ka juh ka por ruh, ka SKDEJHD, ka pynpaw ruh ia ka jingsngewnguh ia ki paidbah, halor ka jingkyrshan, jingpyni lynti, jingai jingmut, jingiaishah bad ka jingiatreilang jong ki bad ka seng kur, naduh ba sdang ban pyniaid ia ki ticket lucky draw bad tad haduh mynta ka sngi bad nangne sha khmat ruh ter-ter.
Kane ka long kat kum u kyrwoh ba la pyllait da u Teras Dkhar, President bad u Besterwell Dkhar, General Secretary ka Seiñ Kur Dkhar East Jaintia Hills District.
