Ki nongshong shnong jong ka Rajbari District jong ka ri Bangladesh kila ban jur ba ka Sorkar Bangladesh hapoh ka jingialam jong u Dr. Muhammad Yunus kan hap ban kitkhlieh halor ka jingshah pyniap sa uwei u Hindu hapoh ka ri Bangladesh kaba la jia ha ka miet Sngi Balang (24.12.2025).
Ka khubor ka iathuh ba sa uwei u briew na ka jait Hindu ia uba la tip kyrteng u Amrit Mondal ula shah bom shah tied ha ki paidbhur ha ka shiteng miet jong ka 24 tarik kat haduh ba u la khlad noh. La iathuh ba kane ka jingshah bom jong utei u Amrit ym shym la pynthikna ba ka dei na ka jingiapher niam, hynrei la kynnoh ba u don kti ha ki kam lute pisa.
Kane ka dei sa kawei pat ka jingshah pyniap jong ki jait bynriew Hindu ha Bangladesh hadien ka jingshah pyniap jong u Dipu Chandra Das ha ki paidbhur bad thang im ia u ha Mymensingh jong ka thaiñ Bhaluka. Kane ka jingiapyniap kala bteng mar sien jia ka jingshah pyniap jong u Osman Hadi uba dei u wei na ki nongialam jong ki samla pule uba la iakhih pyrshah ban weng shuki ia ka Prime Minister barim ka Bangladesh ka Sheikh Hasina.
Katkum ka khubor ba la pynmih da ka The Daily Star na Bangladesh la iathuh ba ki Pulit hapoh ka jingialam jong u Debrata Sarkar uba dei u Assistant Superintendent of Police jong ka Pangsha Circle ula iathuh ba kila shimkhia ia kane ka jingjia bad ha ka jingtohkit ki Pulit kila ioh ban kem ia u Mohammad Selim bad na une u briew kila ioh kurup ar tylli ki suloi bad kawei ka pistol. Ula iathuh ba ka jingtohkit kan dang iaid shakhmat ban lapdien ia kiba pynkheiñ ia ka aiñ.
