[Photo: FJP]
U wei u samla Tripura uba dang 24 snem ka rta ba dang pule MBA ba la tip kyrteng kum u Angel Chakma ula khlad noh hynnin ka sngi hadien 17 sngi ba u la shah sumar hapoh Hospital, na ka daw jong ka jingshah shoh bad shah dung pynmynsaw da ki tiar ba nep.
Katkum ka khubor Pulit na Dehradun la iathuh ba utei u Angel Chakma u dei na ka shnong Nandanagar jong ka District Unakoti ka jylla Tripura. U wan ban pule ia ka MDA jong u hapoh Dehradun. La iathuh ba u Angel ryngkat bad u para jong u, u Michael Chakma kila mih na ka jaka sah ban leit thied jingthied na dukan ha ka 9 tarik mynta u bnai (Nohprah 2025). Ha kum katei ka por kila ia kynduh ia ka kynhun jong ki samla, kiba la sdang ban kren bein kren khoh ia kine ki ar ngut ki samla Tripura da kaba kynthoh “Chinese”, “Chinky” bad “Momos” ia ki.
Hangne kala mih ka jingiania, mar kumta hi katei ka kynhun runar kila shoh la tied ia kitei ki ar ngut bad tied da ki kynja nar bad kila dung ruh bun bun sien ia u Angel da ki tiar kiba nep ha ka bynta ka kpoh jong u kaba la wanrah ia ka jingmynsaw jur.
Hadien kane la leit pynkit mar mar ia u Angel sha jaka sumar, hynrei hadien 17 sngi une u samla ula khlad noh na ka daw jong ka jingmynsaw jur.
Na ka liang ki Pulit jong ka Selaqui PS lyngba u Station in-charge u PB Bhat ula iathuh ba katei ka jingjia kala jia hajan kawei ka dukan die kyiad, ha kaba la suba jur ba kitei ki runar kila buaid kyiad. Ki Pulit hadien bala shim ia ka jingphla na u Michael Chakma, kila register ia ka case bad ha ka jingbud dien kila ioh ban kem haduh 5 ngut ki samla kiba donkti. Ka jingtohkit ka dang iaid shakhmat ban lap sa kiwei de kiba donkti.
