Kum shi bynta ban teh lakam ia ka jingdheng kali bad ban iaid beit ka leit ka wan jong ki nongleit jingiaseng Synod Samla jong ka KJP Synod Mihngi kaba la sdang naduh ka 27 tarik (Sngi Thohdieng) u Rymphang bad kut ha ka sngi 1 tarik u Lber (Sngi U Blei) ha ka shnong Mynso, na ka liang jong ki bor Pulit (Traffic) kila buh katto katne ki rukom pyniaid kali, na ka bynta ka jingiaid beit iaid rynti jong ki kali.
La pynbeit ba ha ka 1 tarik Lber (Sunday), ia u surok na Pasyih bad poi sha Mynso la khang na ka bynta ka jingiaid ki kali paidbah naduh ka por 7:00 mynstep haduh ka por 5:00 janmiet. Yn shah tang ia ki kali ban leit sha ka jingiaseng, ki kali kit nongpang bad ki kali ba la ioh bor ba kin iaid lyngba ia utei u surok hapoh kitei ki por ba la buh.
Ia ki kali bym dei leit jingiaseng la bthah ba kin iaid na kiwei pat ki lynti ban poi sha ka jaka ba ki thmu. Na ka liang ki Pulit Traffic kin don ha kitei ki jaka ba la kdew khnang ban iarap pynbeit ia ka jingiaid ki kali bad ban iarap ia ki paidbah.
Kumta na ka liang jong u Superintendent of Police (SP), West Jaintia Hills District u kyntu ia ki paidbah ban iasnohkti lang bad ka tnad Pulit na ka bynta ka jingsuk jong u paidbah hi.
La pyntip ba ka jingiaseng paidbah kan long ha Dong Nein Shnong, Mynso B kaba don harud jong u surok ban poi sha Pasyih-Jowai.
