Kum shi bynta ban wanrah ïa ki jingshakri bad ka jingpynsngewthuh paidbah ha ka liang ka koit ka khiah, khamtam ha ki jaka nongkyndong, ka ophis jong u District Medical and Health Officer (DMHO), East Jaiñtia Hills District kala pynlong ïa ka Community Outreach and Sensitization Health Camp hapoh ka phang “Every Mother Matters, Every Child Counts” bad ruh kala sdang ïa ka Human Papillomavirus (HPV) Vaccination Campaign ha ka district ha Pamra-Paithlu PHC.
Ha ka jingïalang sdang ia kane ka programme la wan ban ïashim bynta da u Additional Deputy Commissioner A. Nongbri, MCS, ryngkat bad u District Immunization Officer Dr N. P. Suchiang, u District Surveillance Officer Dr L. Sungoh, u Medical & Health Officer ka Pamra Paithlu PHC Dr G. Chyrmang, u Medical Officer ka Rashtriya Bal Swasthya Karyakram (RBSK) Wapung Block Dr I. Dkhar, ki ASHA, ki nongtrei Anganwadi bad ki paidbah nongshong shnong.
Haba kren ha kane ka jingïalang, u Additional Deputy Commissioner A. Nongbri ula ban jur ïa ka kyntien ba ju ong “ka jingïada ka kham bha ban ïa ka jingpynkoit” bad ula kyntu ïa ki paidbah ba kin shim kabu ïa ki jingshakri koit ka khiah bala ai da ka Sorkar. Ula ai jingmut ruh ïa ki paidbah ba kin long kiba phikir ha ka liang ka jingjaboh jong ki jingbam bad ula kyntu ba kin shim ïa ka dawai tika HPV khlem ka jingsheptieng bad ban pan jingïarap na ki doktor haba donkam.
Ka District Immunization Officer Dr (Mrs) N. P. Suchiang kala ong ba ka jingthmu jong kane ka health camp ka long ban wanrah ïa ki jingshakri halor ka koit ka khiah sha ki paidbah, khamtam ki kynthei, khnang ban pynduna ïa ka jingïap jong ki kmie bad ki khyllung. Kala pynpaw ruh ïa ka jingdonkam jong ka HPV vaccine ban ïada ïa ki kynthei na ka jingpang cervical cancer, bad kala ong ba ka jingïalap tika kan ïai bteng haduh lai bnai.
Ka Dr Suchiang kala pyntip ruh ba ka HPV vaccine la ju ai paidbah khamtam ïa ki khynnah kynthei kiba la dap 14 snem ka rta, khnang ban ïada ïa ki na ka cervical cancer. Kiwei pat kiba la ai jingkren ki kynthup ïa Dr L. Sungoh, Dr G. Chyrmang bad Dr (Mrs) I. Dkhar.
Ki jingiarap jong ka koit ka khiah kiba la ai ha kane ka camp ki kynthup ïa ka HIV/STI testing, NCD screening, HPV vaccination, Ayushman Bharat registration, RBSK screening bad kiwei.
