Mynta ka sngi ki dkhot jong ka Joint Action Committee (JAC) jong ka East Jaintia Hills Truck Owners Transport Association (EJHTOTA) bad ka Jaintia Hills Truck Owners Association (JHTOA) ki la ia kynduh ia ki nongpyniaid jong ka Star Cement ba la mihkhmat da u Devender Kumar Bansal bad ka kynhun jong u ha nongbah Khliehriat, ha kaba la dawa ia ka jingpynioh bhah kaba biang ia ki trok jong ki ban kit ia ki mar na katei ka karkhana pynmih dewbilat kaba don ha Lumshnong, East Jaintia Hills District.
Haba kren sha ki lad pathai khubor hadien ka jingialang, u Chairman jong ka JAC u ma Biangshwa Shylla u la ong ba ki la pynpaw ha khmat ka Star Cement ba kin iaid beit shakhmat ia ka prokram jingiakhih jong ki ka ban sdang naduh lashai ka 24 mynta u bnai naduh ka por 10:00 mynstep. Ha kane ka jingiakhih yn khanglut ia baroh ki trok na baroh ar liang jong u surok National Highway 6 ha ka shnong Tuberkmaishnong Tahkhniang, East Jaintia Hills District kiba thmu ban kit mar na ka Star Cement. U ma Shylla u la kynnoh ba ka Stat Cement kala iai bteng ia ki kam buit-tuh jong ka ha ka jingiadei bad ka jingpynioh bhah ia ki trok trai jylla.
Na ka liang ka JAC kala dawa ba ka company ka dei ban ai bha 9 tylli ki trok na kawei kawei ka Association kaba mut 18 tylli ki trok ha ka shisngi ban kit ia ki mar kum ki Cement bad Clinker. Ha kine ki por kiba la dep ki la ioh tang 3 haduh 4 tylli ha ka shisngi kaba pyni ia ka jingleh bym suid niew jong katei ka Company ia ki trai jylla. Kane ka jingdawa jong ka JAC ka dei kaba la dep ban iakren markhmat bad u Deputy Commissioner bad u Superintendent of Police jong katei ka District ha ki por ba la dep, hynrei ka Star Cement kam shym la burom ia katei ka jingiakut.
Na ka liang ka Star Cement kala kyntu ia ka JAC ban weng ia kane ka jingiakhih hynrei pat kam lah ban ai ka jingkular ba paka ia ka JAC. Kumta na ka liang u ma Shylla ula pyntip ba ka jingiakhih kan iaid beit tad haduh ban da ioh ia ki jingdawa, ula kyntu ruh ia ki dkhot jong kine ki ar seng ban iasnohkti lang shitrhem khang ba ki jingdawa kin long kiba jop.