Ki nongrep kiba dei ki trai jaka na ka Shnongrim, Elaka Nongkhlieh, East Jaiñtia Hills District kila pynpaw ka jingsngewkyndit halor ka jingkhot (Public Hearing) ka Meghalaya State Pollution Control Board (MSPCB) haka 22 tarik u Jymmang, 2026 ban tih mawshun ka kharkhana dewbilat M/S Shree Cement haka jaka ba khot ka Lum Syrman haka jingheh kaba 217 hectare.
Kitei ki nongrep naka thaiñ Shnongrim kila pynpaw ka jingpyrshah jur ïa kane ka jingkhot (Public Hearing) khlem da ïoh jingtip na ki trai jaka, shuh shuh kila pynsngew kane ka jingleh bor naduh ka Elaka, ki bor shnong, ka District Council bad MSPCB kala long kumba ïuh roit ïaka hok longtrai ïa ka khyndew ka shyiap.
Mynta ka sngi Thohdieng 24 tarik kitei ki nongrep kila leit mih sha ka ophis JHADC ban ïa kynduh ïa u CEM ka JHADC bad ban ïakren halor katei ka jingkam trai jong katei ka company dewbilat ïa ka jaka Lum Syrman, ha kaba u CEM ula pynsngew ba u khlem ïoh jingtip eiei ha kaba ïadei bad ka jingjer kyrteng ïa katei ka jaka Lum Syrman da ka Block-A bad ka ophis ka khlem ai kano kano ka sanat ïa katei ka shnong.
Halor kane ka jingkhot Public Hearing ka MSPCB, u Pynshai Sutnga ula ong kitei ki nongrep kila dep ban ujor sha ki tnad sorkar babher bapher naduh ka ophis u Deputy Commissioner ka EJHD, sha ka Meghalaya State Pollution Control Board, Shillong bad kumjuh sha ka ophis JHADC ban pyrshahjur ïa kane ka jingthmu.
‘Kum ka kmie kaba peit ïa ka kyndew ka shyiap’ ngi wan ban dawa na ka District Council ban pyndam noh ïa katei ka Public Hearing bad ban pynshisha ïa ka hok long trai jong ki, halor ka jingkam jubor ka M/S Shree Cement ïa katei ka jaka.
Shuh shuh kila pynsngew ha katei jaka u Lum Syrman ki nongshong shnong ki im ha ka rep ka riang ha ryngkat ki jingri jingdup bad ka dei ruh ka jaka jong ki riew shimet kila pynsngew.
Uwei na ki nongrep bad uba dei u nongshong shnong ula maham jur ïa kito kiba ai jingbit sha ka kharkhana ban tih mawshun kynthup ki nongïalam Elaka naduh u Dolloi bad ki dkhot EC kiba soi ïa ka dulir bad lada jia kano kano ka jingsngewsih ha katei ka sngi pynlong ‘Public Hearing’ ki dei ban shim ka jingkitkhlieh, da kaba ki ong ïa katei ka jaka ‘Lum Syrman’ la longtrai da ki nongrep ka thaiñ naduh ki por jong ki longshwa manshwa.
