U nongialam ka National People’s Party (NPP) bad uba dei ruh u National Working President James P K Sangma ha ka 8 tarik Jylliew 2026 u la thep kyrteng na ka bynta ka elekshon Rajya Sabbha hakhmat u Malthus S. Sangma, Secretary ka iing dorbar thawain ka jylla Meghalaya uba dei u Returning Officer.
ïa u James Pk Sangma la Synran lang da ka lok jong u ha ryngkat ka jingiadon lang u Myntri Rangbah ka Jylla bad u President ka NPP u u Conrad K. Sangma, ki Myntri jong ka Meghalaya Democratic Alliance, ki MLA bad ki paralok ba ïatreilang.
U James P K Sangma u dei u kyrtong jong ka Meghalaya Democratic Alliance, bad ki nongmihkhmat na baroh ki paralok ba ïatrei lang, kynthup ïa ka UDP, BJP, HSPDP bad ki MLA shimet ki la donlang ban pynpaw ïa ka jingkyrshan ïa ka jingïeng u James PK Sangma sha ka elekshon Rajya Sabha.
Haba kren hadien ba u la dep thep kyrteng, u James P K Sangma u la ai khublei ïa u Myntri Rangbah ka Jylla, ki Symbud Myntri Rangbah ka Jylla u bah Prestone Tynsong bad u Ma Sniawbhalang Dhar, ki MLA bad ki paralok ba ïatreilang kiba la kyrshan ïa ka jingïakhun kyrtong jong u.
U James Sangma u la ong ba lada un shah jied kum u MP un kren ha Upper House halor ki mat kiba dang sahteng la slem bad ki mat ki ban sa mih na ka bynta ka jylla hadien habud, khnang ba ka sur jong ka Meghalaya kan sawa.
Nalor kata u la pynpaw ia ka jingsngewkmen ba u la shah jied da kawei ka sur da ka sorkar MDA bad u la pynpaw ba u long uba kloi ban shimti ia kano kano ka jingkitkhlieh kaba la pynkhamti ha u. U la bynrap ba ka jingïasngewthuh jingmut ban pynieng ïa u kum u kyrtong ka MDA la poi hadien ka jingïakren hapdeng baroh ki paralok ba ïatreilang.
Ha kajuh ka por, u Myntri Rangbah ka jylla u Conrad K. Sangma u la ong ba lada u kyrtong ka NPP un shah jied kum u MP Rajya Sabha ban wan, un rah ia ki mat kiba kongsan ia ki paidbah ka jylla bad un iashim bynta shitrhem ha ki kam thaw ain bad ki jingiatai ha Rajya Sabha.
“Ngi khmih lynti ba u MP un long kum ka jingkieng hapdeng ka sorkar jylla bad ka sorkar pdeng halor ki mat bapher bapher kiba ka jylla ka donkam ban bud ryntih.Nga ngeit skhem ba un pyndep ia kata ka jingkitkhlieh”, la ong u Myntri Rangbah ka Jylla.
U la ong shuh shuh ba lada shah jied, une u MP ba thymmai un buddien ban pyntreikam ia ka Inner Line Permit bad kiwei kiwei ki kam kiba dang sahteng kiba iadei bad ka jylla.
“Kum ka sorkar bad kum ka seng ngi la pynthikna ba ïa kine ki mat yn shim khia bha,” u la ong.
U Myntri Rangbah ka Jylla ula bynrap ruh ba une u MP ba la shah jied un don ka bynta kaba kongsan ban wanrah ïa ki mat ba la shim da ka sorkar jylla, kynthup ïa ka jingpynrung ïa ka ktien Khasi bad Garo ha ka Khyrnit ba phra, ki mat kiba ïadei bad ka Khyrnit ba Phra, ka FCRA Amendment, ka jingwan buhai shnong beaiñ, ka Inner Line Permit, bad ka Meghalaya Residents Safety & Security Act.
