Ki longkpa jong ka Balang Katholik Parish Jowai, ki la pynlong ia ka sngi burom jong ki hynne ka sngi,07/06/2026 ha Vianni Parish Hall, kaba iahap ruh bad ka sngi rakhe ia ka sngi burom ka Met bad ka Snam U Jisu Khrist ( Corpus Christi) ha kaba tam spah ngut ki longkpa napoh ka Parish ki la iawan shim bynta ha kane ka sngi burom jong ki.
U Phadar Augustine Lamin uba long ruh u Parish Priest ka Parish Jowai haba kren ha kane ka sngi u la shim halor ka phang kaba u Jisu u la kren kiba ong “Nga long u Kpu Uba im uba la wanhiar na bneng” Haba kren halor kane ka phang, u pykynmaw shaphang ka jinngkhraw ka jingisnei u Blei ia ki khun Israel hyndai haba ki thngan bym don jingbam bad haba ki sliang um haba ym ioh um bad U Blei U la bsa da ka Manna kaba U la pynhap na bneng bad ia ka Um kaba mih na U Mawsiang bad ka jinghikai kaba ki khun bynriew ki ioh ka long ba u briew um im tang da u Kpu, hynrei da ka Ktien kaba mih na ka shyntur jong u Blei.
Nangta u Phadar Augustine u ong ba u Manna um dei tang u jingbam, hynrei u dei ka dak ka shin jong ka jingdonkam jong ngi ia U Blei bad ka jingpynkhreh na ka bynta U Kpu ba shisha u ban wanhiar na bneng bad Uta u Kpu uba shisha uba la wanhiar na bneng u dei U Jisu Khrist Uba don bad shongrieh ha ka Iukharist bakhuid kaba dei ka Met bad ka Snam kaba shisha jong u Jisu Khrist bad ka jingdon u Jisu ha ka Iukharist kam dei tang ka jingkynmaw, hynrei u dei shisha U Jisu Khrist hi Uba ai ialade kum ka jingbam lynti jong ki Mynsiem ha kane ka sla pyrthei. U Phadar Augustine u ban shuh shuh da kaba ong “ Kumba U Blei u la bsa ia ki Paid Israel ha Ri- Kynjah kumta ruh U Jisu U bsa da la ka met dala ka snam ia ka jingim jong ki Khristan kiba thngan bad kiba tyrkhong ha ka jingim mynsiem.
U Phadar Augustin u pynkut ia kajingkren jong u da kaba ong ba ka sngi burom Corpus Christy lane ka sngi burom ia ka Met bad ia ka Snam jong U Jisu Khrist kam dei kaba shu kynmaw burom ia u Jisu ha ka Iukharist, hynrei ka pynkynmaw ia u ne ka Khristan ban im ia ka jingim Iukharist kaba man la ka sngi ha ka jingim khristan bad ha kane ka sngi burom jong ki longkpa( Fathers day) bad lyngba kane ka sngi Corpus Christy U Blei Un iaidon bad phi ki longkpa bad ban iarap ia phi ha ka jingim kaba man la ka sngi jong phi.
Ha kane ka sngi la ioh ruh ia ka jingkren kaba sngewtynnat bad ka ban pynsah kynmaw da ki snem ia ki longkpa jong ka Parish da u Babu Stalbinus Dkhar halor ka phang “ Ki Kpa ha ka juk ka Science & Technology, ka jingkitkhlieh ia ka longiing ka longsem, ban im da ki Nuksa bad ban ialam ia ki Khun ki Ksiew ha ka lynti kaba dei ha ka imlang ka sahlang, ha ka Balang, ha ka Ri bad ha ka Jaitbynriew.
Ha kane ka sngi la don ruh ka jingknia Mass bakhuid ( Solenm high Mass) kaba la pynmynta da u Phadar Augustin Lamin ha kaba baroh ki longkpa ki la iashim bynta ha ka iabam ka iasip ia U Kpu U Rynsi Uba la pynkyntang Uba long ka Met bad ka Snam jong u Trai Jisu Khrist.
