Mynta ka sngi Saitjaiñ, 29 tarik u Nailar 2026, u bah Earlyborn Lyngdoh, uba dei u trai jong ka E.L & Family Farm, u la iohlad ban kren bad ki lad pathai khubor ban pynpaw halor ki kam kiba u pynïaid ha ka farm ka jong u kaba don ha ka shnong Rymbai, East Jaiñtia Hills District.
U ma Lyngdoh u la ong ba u ieit bha ïa ka kam rep ka kam ri jingri, khamtam ka jingri syiar bad sniang. U la sdang ïa ka kam rep hajan ka shnong jong u ha u snem 2014. Hadien ba la khang ïa ka tih dewïong ha ka distrik, ki kam ha ka farm jong u ki la shah ktah, hynrei u la sdang biang ïa ka kam rep da ka jingthmu ban tei ïa ka kamai-kajih jong ka ïing ka sem bad ban pynbit pynbiang ïa ka lawei jong ki khun jong u.
Ka jaka kaba mynta ia kaba u sdang ia ka farm la seng ha u snem 2023. Ka jingsdang ïa ka farm kam long kaba suk, namar u hap ban thied jaka, pynïoh ïa ka bording ilektrik na ka shnong kaba jngai kumba 1 km, bad tih ïa ka Pung um kaba jylliew haduh 600 phut.
Ha kaba sdang, u la ri sniang bad syiar kha pylleng (layer chickens). Naduh u snem 2023 haduh 2025, u la don kumba 500 tylli ki layer bad haduh 900 tylli ki broiler. Ha u bnai Ïaïong jong u snem ba la dep, kawei ka jingpang sniang ka la ktah ïa ka farm bad u la duh 90 tylli ki sniang, 30 tylli kiba heh bad kiwei pat ki long ki khun sniang, kaba la pynlong ïa u ban mad ïa ka jingduhnong kaba la antad kumba ₹24 lak.
Haba u dang ïoh nyngkong ïa ka jaka, ki jingthung kim ïoh ban san bha bad wat ki phlang ruh kim san; ka khyndew ka dap da ki maw rit. U la pyndonkam ïa ka eit sniang bad eit syiar kum ka sboh, bad ka khyndew ka la ioh bor bad kylla bha noh kloi. Mynta u la sdang ban thung ia ki strawberry, u synsar, ka kait bad bun jait ki jingthung ha kane ka farm jong u.
U ma Lyngdoh u la ong ba ka farm ka pynmih ïa ka jingïoh noh kaba myntoi, bad ka jingdie ïa ki jingthung ka la pynïoh nong ïa u da ki lak tyngka. U khmih lynti ban ïoh kumba ₹30,000 na ka jingiadie ia ka kait ha ka aiom ban wan.
U la ïoh ruh ïa ka jingïarap na ki tnat Horticulture, Agriculture bad Veterinary. Ha ki por kiba la dep, kine ki tnat ki ju ïarap khamtam ha ka liang ki dawai bad ki jingwan jurip jong ki veterinary doctor. Hynrei mynta u snem, ka ophis Veterinary ka la ai jingïarap da 150 tylli ki layer chickens bad ka jingbam syiar. Ha u snem 2024, u la ïoh ruh ïa ka ram na ka sorkar lyngba ka Piggery Mission loan, bad u la kyrmen ban lah ban siew pyndep ïa ka ram hapoh u bnai Nohprah mynta ka snem.
