Mynta ka sngi Saitjaiñ, 29 tarik u Nailar 2026, ka United Democratic Party (UDP) ka la pynlong ïa ka jingïalang paidbah ha Wika Complex, Khliehriat, kum shi bynta jong ka jingïakhun by-election na bynta u kyrtong jong ka, u bah V. G. K. Kynta.
Ha kane ka jingïalang la wan shim bynta da ki Myntri Sorkar, u Metbah Lyngdoh bad u Lahkmen Rymbui; u MLA ka Khliehriat, u Kyrmen Shylla; u Deputy CEM ka JHADC, u Lasky Rymbai; u UDP MDC, u Wailadameshwa Siangshai; u kyrtong V. G. K. Kynta; ki nongïalam bad ki nongkitkam ka UDP na East Jaiñtia Hills District, ryngkat bad ki paidbah.
Haba kren ha kane ka prokram, u bah V. G. K. Kynta u la ong ba u dei u muktiar jong kiba duk. U la ong ba ha ka por jong ka jingshakri jong u kum u muktiar, u la ïarap ïa palat hajar ngut ki briew, katba ïa ki klient kiba riewspah u shim ïa ka dor katkum ka professional fee jong u. U Kynta u la kren ruh halor ka Mines and Minerals (Development and Regulation) Act, 1957, da kaba ong ba kane ka Aiñ kam dei ban treikam ha ki thaiñ Khasi bad Jaiñtia namar ka rukom bat khyndew hangne ka long kaba pher na kiwei pat ki bynta jong ka ri India. U la pynrem ruh ïa ki kyndon kiba shah ban pyndonkam haduh 100 hectare ka jaka na bynta ki kam tih dewïong, da kaba ong ba kane ka long kaba ktah jur ïa ki trai jaka kiba duk bad kiba don tang ki jaka ba rit.
U ma Lahkmen Rymbui u la ong ba ha kine ki phra snem ba la dep, ki la trei lang bad ka Sorkar bad la lah ban wanrah bun ki jingkylla bad jingroi ha kane ka thaiñ. Kum u nongïalam, u la kyntu ïa ki paidbah ba kin ym duh jingkyrmen halor kane ka elekshon bad ba kin kyrshan ïa u kyrtong jong ka party. Kum u Myntri ka tnat Pule Puthi, u la ong ba u sngewkmen ban ïohi ïa bun ki jingkylla ha ka tnat jong u. U la kdew ruh ïa ka projek Lumshyrmit–Shkentalang kaba la pyntreikam lang bad u MLA ka thaiñ, u Kyrmen Shylla. U la pynpaw ïa ka jingkyrmen ba lada u bah V. G. K. Kynta un jop ïa kane ka by-election, un sa lah ban rah ïa ki jingeh bad ki jingdonkam jong ki paidbah sha Parliament. U la ong ba ka party ka dang bteng ban wad ki lad ki lynti ban pynjem ïa ki jingeh ki paidbah bad kam ju shong kli kti.
U MLA ka thaiñ, u ma Kyrmen Shylla, u la ong ba ha u snem 2018 u la jop ïa ka elekshon bad u la shah thung kum u Myntri, bad ha u snem 2023 u la jop biang. U la kubur ruh ba ka UDP ka la ïoh ïa ka jingtrei kam kaba tlot ha ka elekshon MP ha u snem 2024, da kaba ong ba baroh ki party, ym tang ka UDP, ki la shah ktah ha ka jingwan jong ka ‘wave’ kaba jur ha kane ka elekshon. U la ong ba ka UDP kam ïakhun ïa ki elekshon tang na bynta ki kam Myntri.
U la pdiang sngewbha ïa ka by-election, hynrei u la pynpaw ruh ïa ka jingsngewsih halor ka jingïap jong u MP barim, Dr. Ricky AJ Syngkon. U la ai jingïaroh ïa u kyrtong jong ka party da kaba ong ba u dei u nongïakhun uba khlaiñ namar ba u long u briew uba don ka bynta ban shakri paidbah ha ïingbishar. U Shylla u la ong ba kane ka by-election ka dei ka lad ban pynkhlaiñ bad pynim biang ïa ka party, bad u la ong ba ki paidbah ka Khliehriat ki dang don ka jingshaniah ha ka UDP bad kumjuh ha u hi kum u nongialam. U la kyntu ïa ki paidbah ban ïeng tylli, khnang ban poi sha ka thong. U la kdew ruh ba ki MP kim lah ban pynpoi beit ïa ki skhim sha man la kawei pa kawei ka ïing. U la pynshai ruh ba ki paidbah kiba wan sha kane ka jingïalang pynïakhun elekshon ki la wan da ka mon sngewbha jong ki hi, ym namar ba la siew pisa ïa ki.
U bah Metbah Lyngdoh u la ong ba u la pdiang ïa ka rai jong ki paidbah ha ka elekshon 2024 bad ba ka party ka dang trei shitom ban pynkhlaiñ ïa lade. U la ong ruh ba ia ka tarik jong ka by-election ym pat shym la buh, namar ka SIR ka dang ïaid, hynrei la khmih lynti ba kane ka by-election kan long hapoh ar bnai.
U la ai khublei ïa ki paidbah ka Khliehriat kiba la ai ïa u ma Kyrmen Shylla ïa ki jingjop ha ki ar samoi. U Metbah u la pynpaw ruh ïa ka jingïaid lynti kaba jrong jong ka UDP, kaba long kawei na ki party barim tam hapoh ka jylla.
