Mynta ka sngi u ma Wanshwa Nongtdu uba dei u Nongaiktien jong ka Meghalaya Commercial Truck Owners and Drivers Association (MCTODA) ula wan jngoh ia u Marshall SB Biam, President ka JCOMSWA (Jaiñtia Coal Owners, Miners, Suppliers & Workers Association) uba dang bteng ia ka jingshong shah thngan naduh ka 1 tarik mynta u bnai haduh mynta ka sngi (10/06/2026).
Na ka liang jong u Wanshwa haba kren sha ki lad pathai khubor u la ong ba u wan na ka jingsngew shimet jong u kum u nongshong shnong ka East Jaintia Hills. U pynpaw ka jingsngewnguh ia u Blei namar ka jingkut jingmut jong u Marshall ban ieng pyrshah ia ki jingkhang tih dewiong jong ka NGT kaba la jia naduh u snem 2014. U la pynkynmaw ba ka jingtih ia u dewiong ha rilum Jaintia kala sdang nyngkong eh ha u snem 1984 ha ka shnong Wapungskur, kaba hap mynta hapoh ka East Jaintia Hills District. Naduh katei ka por ka jingtih dewiong kala neh haduh u snem 2014 kaba la kot sha ka 30 snem.
Naduh ba la khang ha u snem 2014 mynta ka kynjoh sha ka 12 snem ka jingkhang tih dewiong, ha kaba ka sorkar jylla kala iai kular ia ki nong Jaintia ban pyllait ia ka jingtih dewiong hynrei ka lah ban leh tang khyndiat eh.
Na ka liang u Wanshwa Nongtdu u la khot ia ki nongshong East Jaintia ban mih shakhmat ban ai ka jingkyrshan ia u Marshall Biam. U ong ba kane ka jingiakhih jong u Marshall kam dei ia ka jingmyntoi shimet jong u, hynrei ka dei na ka bynta ka bha ka miat jong ka District hi baroh kawei. U la kyntu ruh ia ka sorkar ban shimkhia halor kane ka jingeh ba ki paidbah ki iakynduh.
