-Kumjuh ka KSU, ki riew paidbah bad seng longkmie-
Ka jingshah thang jong u President ka JCOMSWA ma Marshall SB Biam na ka bynta ban dawa na ka sorkar ban pynlait ia ka jingkhang tih dewiong, mynta ka la poi sha ka 10 sngi.
Ha kine ki 10 sngi da ki spah spah ngut ki longkmie longkpa na kylleng ki shnong jong ka East Jaintia Hills, kila iatuid bad wan ai mynsiem ia u ma Marshall Biam.
Nalor ki riew paidbah hynne ka sngi la wan ban jngoh bad ai mynsiem ia u ma Marshall da ki MDC bad ki nongialam jong ka seng Congress kiba kynthup na East bad West Jaintia Hills.
Ki MDC kiba la wan ai mynsiem ia u President ka JCOMSWA mynta ka sngi ki kynthup ia u ma Madonbai Rymbai, MDC ka Amwi-Khliehtyrshi, ma Rikut Parien, MDC ka Sahsniang-Saphai, nangta u Presient jong ka Congress East Jaintia ma Maichel Nongtdu, u President ka 6-Khliehriat BCC u ma Piwell Shylla, u General Secretary ka West Jaintia Hills District Congress Commitee bad kiwei de ki nongialam ka party.
Nalor ki nongialam party la wan pynshngaiñ bad ai mynsiem ia u President ka JCOMSWA ban nang ioh bor ban iaid shakhmat tad haduh ba ka sorkar kan pyllait ia ka jingtih dewiong, kiba kynthup ia ki longkmie na Wahiajer, West Jaintia Hills, ki longkmie na Brishyrnot, East Jaintia Hills bad ki longkmie na Wapungskur, East Jaintia Hills.
Na ka liang ka KSU, East Jaintia Hills District Unit ruh hapoh ka jingialam jong u President u ma Streamly N. Suchen bad u General Secretary ma Kwilniss S. Suchiang ryngkat ki dkhot kila wan ban ai mynsiem lem ia u ma Marshall Biam, ha ka jaka shong shah thngan jong u ha Madanbol Ladrymbai Dongwah.
Ha kane ka sngi na ka liang jong ki Doctor kila wan ban peit thuh ia ka koit ka khiah jong u Marshall, hynrei na ka liang jong u, u dang kyntait ban shah eksamin.
Haduh ba thoh ia ka khubor ki nongmihkhmat paidbah naduh ki MDC bad ki MLA jong ka East Jaintia ym pat don ba wan jngoh ia u ma Marshall SB Biam, President ka JCOMSWA. Hynrei kiba wan ki dei tang kiba nabar jong ka East Jaintia Hills District.
[Ma Madonbai Rymbai, MDC]
[Ma Rikut Parien, MDC]
