Ka Jaiñtia Students’ Movement (JSM) Lapangap-Unit, West Jaiñtia Hills District, kala dawa bad kyntu jur ia ka ophis u Sub-Divisional Officer (SDO) ka Meghalaya Energy Corporation Limited (Me.ECL) Khliehtyrshi Distribution Division ban bujli noh ïa ki post light ba la bam sarang bad kiba la jan khyllem hapoh ka shnong Lapangap.
Shuh shuh ka seng kala pynsngew ïa ki jingeh kaba ïadei bad ka light hapoh jong ka Shnong Lapangap namar ki don bun tylli ki post light ha kylleng ka Shnong kiba la sniew lut bad bam sarang ha kaba la pynlong ïa uwei u longkpa ka shnong ban leit kyrshan ïa u post light da ki dieng. La ïathuh kine ki post ki la buh jingma shibun ïaka jingim ki paidbah nongshong shnong, khamtam ha ka por ba jur lyer bad ka por slap.
Nalor kata shibun ki longïing kiba don sha jngai naka surok ki shem jingeh ïaki ban ïaid ban ïeng haka por miet naduh ki khynnah pule, ki tymmen ki san bad ki longkmie.
Haka juh ka pot ka seng JSM Lapangap-Unit ka kyrpad ban bujli mardor ïa baroh ki post light bala sinew bad ban pynbun shuh shuh ïaki post light haki jaka ba jngai khnang ba ki Wire kin ym synjor bad ki nongshong shnong ruh kin ïoh ïaka jingshngaiñ.
Ka JSM ka kyrmen skhem ba ka ophis kan shimkhia mardor ïa kane ka jingkyrpad naka bynta ka bha ka miat ka shong ka thaw.
