U Superintendent of Police ka West Jaiñtia Hills District, Jowai ula pyntip ba ha kane ka 24 tarik Nailar, ki pulit ka Amlarem PS kila ïoh kem na Ladjaplem ïa ar tylli ki thuk thuk (Motorbike), kiba don ïa u registration No. AS-01FK 3482 bad AS- 26A 9873 bad kiba la ñiah da u Pynshngai Jyrwa (23) na Umsning, Lasharai, Mawkhan, Ri-Bhoi District bad u Rijiedstar Shylla (27) na Umsning, Sohkyndur, Ri-Bhoi District.
Ki pulit haka jingtalasi bad tohkit ïa kitei briew bad ki thuk thuk la lap bad pyntikna bala rong tuh ïa kine ki thuk thuk na Changsari, Assam, kumta ki pulit kila register case katkum ka kyndon 303 (2) BNS. Ïa kitei baroh ar tylli ki thuk thuk bad ki briew ba shah kem la aiti noh ïa ki sha ki pulit ka Changsari Police Station, Assam na ka bynta ban leh ïa kaba donkam.
Shuh shuh, ha katei ka juh ka sngi jong ka 24 tarik sa ar tylli pat ki thuk thuk ba suba shah tuh kiba don ïa u No. NL-07EB 8467 bad AS- 05S 3378 ha ryngkat ki nongñiah la ïoh kem da ki pulit ka Dawki PS. Ïa kitei ki thuk thuk la buh ha Dawki PS na ka bynta ka jingtohkit ba bniah.
Na ka liang jong ki Pulit ka District kika kyntu ïa ki paidbah ban long kiba husiar bad sumar bha ïa ki kali ki mator bad khamtam ia ki kali ar shaka ki jong ki, la kyntu ruh ba lada don kino kino ki jingsuba shah tuh ki dei ban pyntip mar mar sha ki Pulit lane phone ha u No: 112.
