Mynta ka sngi ka (12/06/2026) ka Jowai Co-operative Urban Bank ka la ïoh ban plie ïa ka tnat thymmai kaba la tip kum ka Ladthadlaboh Branch ha Ladthadlaboh, Jowai. Ka jingthmu jong kane ka jingplie ïa kane ka tnat ba thymmai ka long ban pyniar shuh shuh bad ban pynsuk ïa ki paidbah khamtam kiba shong ba sah ha ka thaiň Ladthadlaboh kiba ïa dei kam bad kane ka Bank.
ïa kane ka tnat thymmai jong ka Jowai Co-operative Urban Bank, kaba don ha Head Office, Ladthadlaboh, Jowai la wan ban plie paidbah da u Ma P. Pariat u ba dei u Chairman ka Bank u ba long u Kongsan jong kane ka prokram. Ha kane ka jingïalang la don lang u Ma J. M. Paswet, na ka ophis Assistant Registrar of Cooperative Societies, West Jaintia Hills District kum u Symbud Kongsan, u Ma R.L Syngkon u ba long u Branch Manager, u Ma B. Pyrngap (AGM, JCUB), u Ma A. H. Lytan, Incharge CEO, lem bad ki nongtrei jong ka ne ka Bank.
Haba ai jingkren u Ma P. Pariat u la ai Khublei ia baroh ki nongtrei (Staff) ki Officer jong ka bank ïa ka jingtrei shitom jong ki na ka bynta ban pynïaid beit pynïaid ryntih ïa ki kam jong ka Bank na ka wei ka por sha ka wei pat.
U la ong ba kane ka sngi ka long ka sngi jong ka jingsahkynmaw jong ka Jowai Co-operative Urban Bank ba haduh ba ka long kumne dei lyngba ki Director. “Naduh u snem 2014 ngi la don katto katne ngut, ngi la ïashomg meeting ha kata hi ka por ngi la rai kawei ka jingmut ba lada kumno kumno kane ka Jowai Co-operative Urban Bank kaba la seng da ki Ma ki Woh tang ha ki ïing wai ha ka por jong ki ka dei ban ïoh ïa la ka jong ka ïing khnang ban lah ban kyntiew ïa ka. Kumta hi ha ka jingshah shitom jong ka jingïaid lynti suki suki ngi la ïoh ban thied ïa ka ïing. Hadien ba la ïoh ïa ka ïing ruh ha ka jingïaid lynti ngi ïakynduh shibun ki jingeh hynrei da ka jingtrei shitom jong ki nongtrei suki suki ngi lah ban pynbiang ïa ki jingdonkam jong ka bank”, u la ong.
U la pynpaw ka jingkmen ba la lah ban pynheh ïa ka Bank bad ban pynjan ïa ka Bank sha ki paidbah haduh ba kane ka sngi ka long ka sngi jong ka jingsahkynmaw namar ba ka Jowai Co-operative Urban Bank ka la ïoh ban plie ïa ka Branch kaba thymmai hapoh Ladthadlaboh. La khmih lynti ba kane ka bank kan ai ka jingshakri ïa ki paidbah naduh kiba trei ha ki kam sorkar, kiba trei business ne ïa kino kino ki paidbah kiba donkam ïa ka jingïarap lyngba ka jingïalam jong u Branch Manager, ki nongtrei kin pdiang ïa ki paidbah kiba wan sha kane ka bank da ka mynsiem kaba khuid kaba jai jai da ki kyntien kiba Jem.
Habu pynkut ïa ka jingkren u Ma P. Pariat u pynkut da ki ktien “Im slem Jowai Co-operative Urban Bank.
Na ka liang jong u Kongsan u la ot ïa u Cake bad ot ruh ïa u Ribbon kum ka dak jong ka jingplie ïa kane ka Bank.
Kiwei de kiba la ai jingkren ha kane ka prokram ki kynthup ïa u ma J. M Paswet, SO ARCS, WJHD, u Ma B. Pyrngap, AGM JCUB, u A.H Lytan, Incharge CEO, u R.L. Syngkon, Branch Manager bad kiwei.
