U samla Erick Nongrum, uba bat kum u Mr. Nature Meghalaya 2025 bad 1st Runner-Up of Mr. Baisakhi 2026, ula pyntip ba u la shah jied ban iakhun ia ka Mr. Teen Royal Northeast 2027 pageant ka ban sa pynlong ha ka 7 tarik u Kyllalyngkot 2027 ha nongbah Imphal jong ka jylla Manipur.
U samla Erick Nongrum un mihkhmat ia ka Jylla Meghalaya ha kane ka rynsan. U samla Erick ula ong ba kane ka jingiohlad jong u ban leit iashim bynta ha katei ka rynsan kaba heh kam dei tang ka burom ia u ialade shimet hynrei kan long ruh ka burom ia ka jylla hi baroh kawei ha kaba un sa ioh ban pyni sha kiwei ia ki sap ki phong, ki riti dusture bad ka dor jong ka jylla Meghalaya.
Kum u nongiashim bynta u Erick u pynleit jingmut halor ka ‘Jingkoit jingkhiah ki jingmut jingpyrkhat bad ka jingtei ia ka met ka phad’ (Mental Health awareness and body positivity). U don ruh ka jingthrang ban pynshlur ia ki samla ban long kiba don ka jingshaniah halade bad ia ka jingdonak jong ka jingkoit jingkhiah ha ki bor pyrkhat.
U la khot bad kyntu ia ki nongshong shnong ka jylla Meghalaya ban ai lem ka jingkyrshan ia u la ha kino kino ki bynta, khnang ban yn lah ban wanrah ia ka nam bad ka burom jong ka jylla hi baroh kawei.
