Mynta ka sngi, ka 14 tarik u bnai Jylliew 2026, ka dei ka sngi kaba 14 jong ka jingshah thngan khlem pud jong u bah Marshall S. B. Biam, President jong ka JCOMSWA (Jaintia Coal Owners, Minder, Suppliers & Workers Association).
Ka tnat ka Koit ka Khiah ka la eksamin ia u President bad ka la iathuh ha ki lad pathai khubor ba ka jinglong jingman jong u ka la nang kham bha, bad ka jingai drip ia u ka dang bteng.
Mynta ka sngi ki paidbah bad ki nongkyrshan na kylleng ki la ia lum lang ban pyni ia ka jingkyrshan jong ki ia u President ka JCOMSWA.
Haba iakren bad ki lad pathai khubor, arngut ki longkmie na East Jaintia Hills District ki la batai kumno ka jingkhang tih dewiong ka la ktah ia ka iing ka sem jong ki bad ia ka kamai kajih jong ki.
Kawei ka kmie tymmen ka la ong ba kim nang ban wad kam shabar jong ka jingtih dewiong bad ka la duwai ba U Blei un iarap ia u President ka JCOMSWA ha ka jingialeh jong u ban ioh ban shah biang ban tih dewiong ha ka District.
Kawei pat ka longkmie ka la kyntu ïa ka Sorkar bad ia ka NGT ban plie biang ïa ka jingtih dewïong na ka bynta ki longïing kiba duna ka ïoh ka kot. Ka la ong ba ka jingdawa 100 hektar ban tih dewiong ka long kaba ym lah ban leh na ka bynta kiba bun ki briew, kiba don tang 5–10 hektar ka la kylli hato ka jingdon 5–10 hektar ka mut ba kim shah ban tih dewiong. Ka la bynrap ruh ba ka jingphah skul ïa ki khun ki kti bad ka jingthied marbam ka la long kaba eh. Ka la ai khublei ia u President ka JCOMSWA bad kitbok kitrwiang ia u ba un koit un khiah.
