Ka Annual Regional Meeting ba 36 jong ka Young Man Christian Association (YMCA) Northeast Region of India mynta u snem ka la long ha shnong Nongtalang, West Jaiñtia Hills District Meghalaya, kane ka jingïakynduh lang jong ki dkhot ka YMCA Northeast Region shisen shisnem ka la sdang naduh ka 11 tarik Jylliew bad kala kut haka 13 tarik Jylliew 2026.
Ha kane ka Annual Regional Meeting la don shibun ki program kiba kynthup ïa ki program phylliew jingmut kumno ban kyntiew ïa ki kam ka YMCA, ki jingkren halor ki phang bapher bapher kiba kyntiew ïa ka bha ka miat ka imlang ka sahlang, ki jingrwai bad ki jingïalang pynbeit kam.
Ka mat pdeng jong kane ka jingïakynduh mynta u snem ka long “Resilience and sustainability to fight Climate Change and Empower Youth”.
La ïoh ruh ki kyntien pdiang burom ïa ki delicate kiba wan na ki jylla ba pher bapher jong ka thaiñ shatei lammihngi kum na Mizoram, Nagaland, Arunachal Pradesh, Sikkim bad kumjuh ïa kiba na kane hi ka jylla da u bah FH Rymbui uba dei President jong ka Nongtalang YMCA bad bud pat sa ka jingkren lyngkot na u bah Shamir J Thabah u Regional Security YMCA, Northeast Region jong ka ri India.
Ha kane ka sngi sdang jong kane ka Regional Meeting haka technical session la ïoh ka jingkren na i resource person i bah Ruhipaia C. Phawa u member jong ka Jowai City YMCA uba la batai halor ka phang “Media and youth empowerment”.
U bah Ruhi Phawa haba ai jingkren halor kane ka phang ha kane ka sngi, ula ong ba ka jing don jong ka media ka ïarap bad ai jingmyntoi shibun ïa ki samla ha kine ki sngi. Ula ong ba ka media ka pynsuk ïa ki samla ha ka ban wad jingtip ne pule lyngba jong ka, ka ïarap ruh ban pyni ïa ki sap ki phong jong ki ba donsap sha ka pyrthei bad ruh ban kyntiew ïa ki kam babha jong ki samla ha ka imlang sahlang.
Ula ong ruh ba ym baroh kiba phi ïohi ha ki media khamtam ha ki social media ki long kiba bha bad kiba shisha, hynrei long kiba tip ban jied kano kaba dei bad kano ka bym dei, namar mynta ki sngi ki don shibun ki khubor thok bad kiba pynsngewthuh bakla ïa ki samla.
Da kaba kren kyrpang sha ki samla Khristan, ula kyntu ïa ki samla ban pyndonkam hok ïa ka media bad ban kiar na ki khubor lamler, ban kiar na kaba thok bad ki jingpynbiej lyngba ka media kiba lah ban pynsniew dur ïa ka jingim jong ki bad ka jingngeit.
Ula ong ruh ba ha ki por jong ka jingpang, ka jingsngewsih ne ka jingeh ha ka jingim, ki samla ki dei ban wad nyngkong ïa U Blei lyngba ka jingduwai bad ka jingpule ïa ka Bible ym da kaba wad jingsngew synei da kaba post haki social media. Ha kaba kut, ula kyntu ïa ki samla ban pyndonkam ïa ka media kum ka atiar ban shakri, ban kren ïa ka jingshisha bad ban long ki sakhi ba bha na ka bynta U Khrist.
Ha ka 12 tarik u Jylliew haka first session la ïoh ka jingkren na u Shaji James, Secretary, MSD, NCYI halor ka phang “Resilience & Sustainability Leadership in fostering YMCA Ministry”.
U bah Shaji James haba ai jingkren u pynshai baka YMCA ka dei ka Movement kaba wad ki lad ki lynti ban pynshlur ïa ki samla ha baroh ki liang bad ruh ban long kiba im hok im khuid kiba don ka jingkitkhlieh bad kiba ïa beh ïa ka jingshisha.
Katba ha ka session ba lai pat la ïoh ïa ka jingkren na u Joe RZ Thanga, Regional Committee Member, NEIR halor ka phang “Resilience and challenges to Youth Empowerments, ha ka jingkren ka jong u, ula kren shaphang ka jinglong skhem ki samla Tribal ha ka jinglong tynrai ka jong ki haka juh ka por ki shlur ban beh ïa ka lawei ba phyrnai jong ka mariang na ka bynta ki longdien.
Ha shwa ban sdang kine kiei kiei baroh la ïoh ïa ka jingduwai step na u Saroy Das, President, YMCA Gangtok (Sikkim) bad ruh ha shwa kine ki session jong ka 12 tarik la don ka jingïalang plie kaba lyngkot ha kaba u bah Jamshaphrang Pohtam, MDC uba long kum u kongsan haka jingïalang bala pynïaid da u bah Rijiedmi Lamin, member YMCA Nongtalang.
U bah Jamshaphrang kum u kongsan haba ai jingkren u ai khublei ïa ka YMCA ba ka shim ïa kane ka sienjam ban pynshlur ïa ki samla ban ïaleh ban control ïa ka climate change, u ong ka climate change kam dei kaei kaei kaba ngi shu lah ban ïohi mar shu peit sha ka mariang, hynrei dei ban iehnoh ïaka jinglong thurmur bad ban pynkylla ïa ka jinglong ha kaba ïadei bad ka mariang, khnang ban ïoh ka jingkylla u buh ha khmat da kaba ong ‘aiu ngin leh ban ngin ïoh ïa ka mariang kaba khuid’.
Ha kane ka juh ka sngi kala don ruh ka jingpynkup burom da u bah Shamir J Thabah u Regional Security YMCA Northeast Region jong ka ri India, ïa ki arngut ki nongkitkam ka YMCA kiba la treishitom bha ban kyntiew ïa ka YMCA kynthup ïa u bah FH Rymbui President jong ka Nongtalang YMCA bad ïa u bah John Shullai, President Jowai City YMCA.
