Ka Khasi Students’ Union (KSU), South West Border Circle, ha poh ka jingia ialam u samla Kampher Pohthmi Vice President bad samla Wanlam L Gadew ha ryngkat ka jing synran lang ki Nongialam na ka district ba kynthup ia u samla Hamewanpynhun Ryngkhlem, Cherity Suja , Shwari Ryngkhlem bad ha ka jing don Ryngkat U samla Pynshai Kupar M Dkhar publicity KSU Central Executive Council mynta ka sngi ka la ïakynduh ïa u Deputy Chief Executive Member (Dy. CEM), Bah Lasky Rymbai, bad la ioh ruh ban ïa kren bad u Executive Member ba peit ïa ka Elaka Rymbai, Bah Moonlight Pariat, ha ophis jong ka Jaintia Hills Autonomous District Council (JHADC), ban aiti ïa ka memorandum jingdawa pynshai halor ka jingbym pat ai Sanad ïa u Waheh Shnong ba la shah jied paidbah jong ka shnong Huroi bad ban ïakren ïa ki bynta kiba ïadei bad kane ka kam.
Namar ka jingbym don jong u Chief Executive Member (CEM) ha ka ophis, ka Union ka la aiti ïa ka memorandum sha u Dy. CEM ha ka jing don ryngkat u Executive Member ba dei peit ïa ka Elaka Rymbai. Ha ka jingïalang, ka Union ka la pynpaw ïa ki jingsngewkhia jong ki paidbah nong shong shnong Huroi halor ka jingslem ban ai jingithuh bad ban ai Sanad ïa u Waheh Shnong ba la shah jied paidbah, kaba la wanrah ïa ka jingeh bad ka jingbym shai hapdeng ki paidbah shnong.
Ha ka jingïakren, u Dy. CEM bad u Executive Member ki la pynthikna ïa ka Union ba ka Council kan shimkhia ïa kane ka mat bad kan peit bniah ïa ki jingdawa bad ki jingsngewkhia ba la buh ha ka memorandum. Ki la pynpaw ruh ba ka Council kan leh ïa kaba donkam katkum ka aiñ bad ha ka jingmyntoi jong ki paidbah shnong Huroi.
Ka Khasi Students’ Union (KSU), South West Border Circle, ka khmih lynti ïa ka jubab kaba shai halor ka memorandum ba la aiti bad ka ai por 10 (shiphew) sngi ïa ka Jaintia Hills Autonomous District Council (JHADC) ban peit bniah bad shim ïa ki sienjam kiba donkam halor kane ka mat. Ka KSU ka don ka jingkyrmen bad ka jingshaniah ba ka Council kan pyndep ïa la ki kamram bad ki jingkitkhlieh katkum ka aiñ bad ka bor ba la pynkup ha ka hapoh ka Sixth Schedule jong ka Riti Synshar ka Ri India, khnang ban pynbeit ïa kane ka kam ha ka jingmyntoi jong ki paidbah shnong Huroi.
Ka Union ka ngeit ba ka Council, kum ka bor ba dei peit ïa ka synshar shnong bad ka jingtreikam jong ki shnong hapoh ka jylla, kan shim ïa ki rai kiba donkam khnang ban pynthikna ba ki paidbah shnong Huroi kin ïoh ïa ki hok bad ki jingshakri paidbah kiba dei hok ban ïoh.
Ka Khasi Students’ Union (KSU), South West Border Circle, ryngkat bad ki paidbah shnong Huroi, kin nang bteng ban buddien ïa kane ka mat bad ki khmih lynti ba ka Council kan shim ïa ki sienjam kiba biang hapoh ka por ba la buh, khnang ban wanrah ïa ka jingïoh jingïada ïa ka hok, ka synshar paidbah bad ka jingmyntoi jong ki paidbah shnong Huroi.