Ka seng Meghalaya Indigenous Women’s Council (M. I. W. C) ka pynpaw ba ka kyrshan radbah ia ka rai jong ka Dorbar jong ki nong ialam ki kur hapoh Jaintia Hills District ba ka JHADC ka dei ban i thuh noh tang ia ki kur (matrimonial) kiba dei ki trai ri trai muluk hapoh u pud u sam jong ka Jaintia Hills ryngkat ban thaw noh ia ki aiñ (clan bill) ban iada ia ka hok long trai kum ki sixth schedule bad ba kan long ka aiñ kaba pura bad kaba paka (CLANS ACT) khnang ba lyngba ka jingdon jong ki aiñ ba pura yn sa lah ban iada ia ka ri bad ka jaitbynriew kumjuh ba yn sa lah ban teh lakam ruh ia ka shong kha khleh.
Ka seng ka pynpaw ba ka jaitbynriew kan ka shah tyllep ha ki bar jylla bad ia kiba ioh lok ne ioh kpa bar jylla dei ban pynduh ST noh, namar ia ka jait bynriew Khasi Pnar la tip ia ha satlak pyrthei ba ka long kiba kyrpang da kaba ai jait sha ka kmie naduh hyndai hynthai, kiba tip kur tip kha. Ka seng ka pynrem jur ruh ia ka JHADC halor ka notification jong ka ba la ithuh ia ki kur jong kiwei ki jaitbynriew bad dei kiba ai jait kpa kiba don hapoh u pud u sam jong ka Jaintia Hills kaba sngew phylla ka long ba haduh mynta ia ki kur ki trai ri trai muluk ym pat la i thuh da ka District council.
“Ka District Council ka la dei ban ithuh shwa ia ki jaitbynriew la jong ym ia ki jong kiwei shwa bad lada ka District Council ka sngap mynthi ne leh mynthi ia kaei kaei ka bym iahap kat kum ka constitution ngin hap ia mih ryngkat ki paidbah ban dawa ia ka hok ne wat lada ngi hap ban ia khih ruh ngin ia khih na bynta ban iada ia ka riti dustur, ka ri bad ka jaitbynriew” la pynpaw ka seng.
Kane ka long katkum ka kyrwoh khubor ba la pyllait da ka President ka seng kong Bythygrace Dkhar.