Ka District Social Welfare Officer (DSWO), West Jaiñtia Hills District, ha ryngkat ka jingïatreilang u myntri ba peit ïaka koit ka khiah bad ka tnad ïalehkai Sports ka sorkar jylla u ma Wailadmiki Shylla, hynnin ka sngi 24 tarik kila pynlong ïaka Veterans Friendly Football Match hapoh ka Nasha Mukt Bharat Abhiyaan 2026, kaba la pynlong ha madan Wahiajer Stadium, West Jaintia Hills.
Ïa kane ka jingïalehkai phutbol la sdang haka por 3 baje janmiet, la wan ban ïashim bynta lang da ki riewrangbah kiba la heh rta bad ki dkhot nongïalam shnong, kum ka dak ban kyrshan ïa kane ka prokram pyrshah ïa ka jingdih drug ha ka ri baroh kawei.
Ha kane ka sngi la pynlong ïaka prokram ba lyngkot, da kaba pynsngew shaphang ki jingma kiba mih na ki jingdih buaid, ban kiar ïa kane la kyntu ïa ki khun samla ban shim ïa ki jingïalehkai hakhmat eh, ka rukom im kaba koit ba khiah bad ban ïatreilang haka imlang sahlang da kaba ïaleh pyrshah ïa u drug.
Kiba bun na ki nongkren kila ban jur shaphang ka jingïalehkai kawei na ka atiar kaba khlaiñ haka koit ka khiah, kaba wanrah ka jinglong ryntih bad ka jingïatylli lang kawei, da kaba kyntu ïa ki samla ban kiar katba lah na u drug u jingdih ba sniew tam ha ka jingim.
Ha kaba pynkut ïa ka jingïalehkai paralok, la sam ïa ki khusnam sha baroh ki nongïalehkai phutbol kiba la wan ban ïashim bynta, kum ka dak ban kyrshan ïa ka prokram Nasha Mukt Bharat Abhiyaan 2026.
