Ka sienjam ba san (5th) jong ka jingïakop mareh marathon kaba la tip da ka ‘Sohra International Half Marathon 2026’ kan long ha ka 4 Nailur 2026 bad la pynbna da ka Meghalaya State Olympic Association (MSOA) ha ka 24 tarik Jylliew 2026.
Ïa kane ka jingïakop la pynïaid da ka Directorate of Sports & Youth Affairs, ha ka jingïatreilang bad ka Meghalaya State Olympic Association bad ka Meghalaya Athletics Association.
Ka sienjam kaba saw (4th) jong kane ka Sohra International Half Marathon ba la pynlong ha ka 27 tarik Nailur 2025, ka la khring haduh 10,576 ngut kaba dei ka rekod ha ka jingbun ki nongïashim bynta, bad mynta u snem la khmih lynti ïa ka jingïashim bynta kan kham bun kumjuh ruh kiba na bar ri. Ka MSOA ka la pyntip ruh ba mynta u snem kan ym pdiang palat ïa 11000 ngut ki nongïashimbynta.
Kane ka jingïakop mareh thong ka kynthup ïa ka 21K, 10K, bad ka 5K Run for fun.
Ha ka 21K Elite Open (18 Years Above) ka khusnam kan long 3 lakh ha ka kyrdan kaba nyngkong, 2 lakh ha ka kyrdan kaba ar bad 1 lakh ha ka kyrdan kaba lai nalor nangta kan don ruh ka khusnam Consolation kaba 5 ngut kaba long 10,000/- marwei kaba kynthup ia ki Shynrang bad Kynthei ruh Kumjuh.
Ha ka 21K Meghalaya Open (above 18 Years) kaba kynthup lang ia ki Kynthei bad Shynrang ki nongjop kin ioh ia ka Khusnam kaba 50 hajar ha ka kyrdan kaba nyngkong, 30 hajar ha ka kyrdan kaba ar bad 20 hajar ha ka kyrdan kaba lai bad 5 tylli ki Consolation Prize ha ka dor 5 hajar marwei kynthup ia ki Shynrang bad Kynthei.
Ha ka 10K Meghalaya Open (18 to below 40 Years) ka Khusnam na ka bynta kiba wan ha ka kyrdan kaba nyngkong kan long 30 hajar, ba wan ha ka kyrdan kaba ar 20 hajar bad 10 hajar ha ka kyrdan kaba lai bad nangta kan don ka Consolation Prize kaba 5 hajar marwei haduh 5 ngut kynthup ia ki Shynrang bad ki Kynthei.
Ha ka 10K Meghalaya Open (40 to below 55 years); Kiba wan ha ka kyrdan kaba nyngkong kin ioh ia ka song pisa kaba 25 hajar , ba wan ha ka kyrdan kaba ar kin ioh ia ka khusnam kaba 15 hajar bad ba wan ha ka kyrdan kaba lai kin ioh ia ka Khusnam kaba 10 hajar bad kin don ruh haduh 5 tylli ki Consolation Prize ba kynthup 3 hajar marwei ba kynthup ia ki Shynrang bad ki Kynthei.
Ha ka 10K Meghalaya Open (55 Years Above), ka khusnam na ka bynta kiba wan ha ka kyrdan kaba nyngkong kan long 25 hajar, ba wan ha ka kyrdan kaba ar kan long 15 hajar, ba wan ha ka kyrdan kaba lai kan long 10 hajar bad 5 tylli ki Consolation Prize ba 3 hajar marwei kynthup lang ia ki Shynrang bad ki Kynthei.
Shuh shuh haba iadei bad ka bairung ka dor ka long 2 hajar tyngka ha ka 21K Elite Men & Women, ha ka 21K Meghalayan Open Men & Women kan long 1 hajar, ha ka 10K Meghalayan open Men & Women ka dor kan long 200 tyngka, bad ha ka Run for Fun Men & Women ka dor kan long 100 tyngka bad Run for Fun na ka bynta ki nongshnong shnong ka Sohra kan long free entry khlem donkam ia ka bai rung.
Ha Kane ka 5th International Half Marathon kan don ruh ka Khusnam jingai sngewbha sha ki 200 ngut ki khynnah 14 snem kiba mareh na ka bynta ka Run for Fun 5K bad na ka bynta kito kiba la palat 55 snem Shajrong kiba pyndep ia ka jingmareh kaba 21K bad kiba la 60 snem Shajrong kiba pyndep ia ka jingmareh 10K kin ioh ia ka Khusnam Consolation Prize ha kane ka 5th International Half Marathon 2026.
Ka tarik ban pdiang ia ka jingpynrung kyrteng kan long naduh 1 tarik Naitung 2026 haduh ka 15 tarik Nailar 2026 ha ka website jong ka Meghalaya State Olympic Association (MSOA).