Ka Ladrymbai-B Sports Club ka pynrem jur ïa ka jingleh jong ka East Jaiñtia District Cricket Association (EJDCA) ha kane ka lympung Knockout Tournament 2026 kaba dang ïaid shakhmat.
Ha ka 20 tarik u bnai may 2026, ha ka jingïalehkai Semi-Final ha madan Mookhep hapdeng ka Ladrymbai-B Sports Club pyrshah ïa ka Dein Chynrum CC, la lap ba ka Dein Chynrum CC ka la pynïalehkai ïa lai ngut ki nongïalehkai ba na shabar jong ka district/league. Kane ka dei ka jingpynkheiñ ïa ka Rule-16 jong ka EJDCA Rules & Regulations, kumta ka Ladrymbai-B Sports Club ka la shah rem da kaba kamai tang 12 ron.
Watla ka seng ka la dep buh ïa ka jingujor kaba thikna (Shithi No.15, kaba 20/05/2026) ryngkat bad ka bai lutksan kaba donkam, hynrei ka EJDCA kam shym la jubab ei ei. Ha ka jaka kata, la khot ïa ka jingïakren ha ka 8 tarik u bnai June 2026 ha kawei ka dukan ha Dkhiah East, ïa kaba ka Ladrymbai-B Sports Club kam shym la pdiang, bad ym pat ïoh jubab da ka jingthoh haduh mynta.
Ha ka 15 tarik u bnai June 2026, ka Club ka la pyntip ïa kane ka kam sha u Deputy Commissioner, East Jaintia Hills District (Shithi No.LBSC/Comp/EJDCA/2/2026), da kaba kyrpad ba dei ban pynsangeh noh ïa ka Final katba dang don ka jingtohkit, hynrei ka EJDCA ka la ïaid shakhmat bad pynbna ba ka Final kan long hapdeng ka Dein Chynrum CC bad ka Lumshnong Block ha ka 26 tarik u bnai June 2026 ha madan RBDCA, Ribhoi District.
Ka Ladrymbai-B Sports Club ka pyrshah jur ia kane ka jingleh khlem jingkitkhlieh bad ka jingleh khlem akor jong ki nongpyniaid ka Association. Kane ka jingleh ka pynmih ïa ka jingsngewkhia kaba jur shaphang ka jinglong hok, ka jingsynshar bad ka lawei jong ki nongialehkai samla ha ka distrik.
Ha ka juh ka por ka Ladrymbai-B ka kyrpad ïa ka synjuk jong ka Meghalaya Cricket ban bishar lem halor kane ka jingpynkheiñ ka EJDCA ïa ka kyndon Rule-16. La kyntu ruh ïa State level ba kan peit bha ïa ka jingpynialehkai kiba biang ha ki kyrdan jong ki District bad khaddeh eh la kyntu ia ka State ba kan bthah ia ka EJDCA ban pynsangeh shwa ïa ka Final tad haduh ban da pyndep shwa ïa ka jingtohkit.