Ka ophis District Social Welfare Officer, West Jaintia Hills ha ka jingïatrei lang bad ka District Administration, Jowai bad ki tnad treikam bapher bapher lem bad ki kynhun treimon sngewbha (NGOs) kila rakhe ïa ka sngi pyrshah dih bad khaïi drug ïa kaba la tip kum ka ‘International Day Against Drug abuse and Illicit Trafficking’ da kaba pynlong ïa ka jingai jinghikai pynsngewthuh kaba dei shi bynta jong ka prokram “Nasha Mukt Bharat Abhiyaan- Viksit Bharat Ki Pehchaan” bad la pynlong ha District Library Auditorium, Mynthong, Jowai.
Ka phang pdeng jong kane ka prokram ka long “Break the Cycle Stop Organised Crime” ha kaba la wan ban ïadon lang da ka Additional Deputy Commissioner ka WJHD, kong DV Lyngdoh, MCS kum ka kongsan kaba la pyllait paitbah ruh ïa kot ba la pynkhreh da ka ophis District Social Welfare Office. Jowai.
Ha ka jingkren jong ka, ka kong Lyngdoh ka la ban jur ïa ka jingthmu ba kongsan jong ka jingrakhe ïa kane ka sngi bad ka la pynpaw ïa ka jingdonkam ban don ka jingïatylli bad kaba neh ban ïaleh pyrshah ïa ka jingdih drok, da kaba ong ba ym don kawei ka tnad ne ka tnad treikam kaba lah ban ïakhun marwei ïa kane ka jingma. Ka la khot ïa ka jingïatreilang kaba khlaiñ hapdeng ki tnad sorkar, ki bor jong ka aiñ, ki jaka pule, ki nongïalam shnong, ki seng treimon sngewbha bad ki paidbah ban tei ïa ka imlang sahlang kaba lait na ka jingdih buaid.
Ka la ong ba ka jingrakhe ïa ka sngi pyrshah ïa ka jingdih drug bad ka jingkhaïi beaiñ ka long kum ka jingpynkynmaw ïa ka jingma kaba nang jur kaba mih na ki drug bad ka long kaba donkam ban pynjur ia ka jingpynsngewthuh sha ki paidbah halor kane ka jingma. Ka la ban jur ba ka jingdih drug kam pynjot tang ïa ka jingim bad ka lawei jong ki briew shimet khamtam eh ïa ki samla, hynrei ka ktah ruh ïa ki longïing, ki jaka trei bad ka imlang sahlang jong ki shnong ki thaw. Ka la kyntu ïa ki kmie ki kpa, ki nonghikai bad ki nongshong shnong ban long kiba husiar, ban ithuh kloi ïa ki dak jong ka jingdih buaid bad ban ai jingkyrshan bad jingiarap ha ka por kaba biang na ka bynta kito kiba ngop ha kane ka jingma.
Ka kong Lyngdoh kala kdew ruh ïa ki lad ki lynti kiba ka sorkar kala shim na ka bynta ban ïaleh pyrshah ïa u drug. Ka la buh ka jingkyntu ïa ki jingpynshlur ïa ki nongshong shnong ban long kiba kloi ban kyrshan ïa kane ka jingthmu da kaba pynsaphriang ïa ki jingpynsngewthuh ïa ka jingktah jong u drug ïa ki khun samla jong ka imlang ka sahlang.
Kiwei de kiba ai jingkren ha kane ka prokram ki kynthup ia i Dr. E. Dann, Medical and Health Officer, Jowai Civil Hospital cum District Nodal officer, District. Mental Health Program West Jaintia Hills District Jowai bad u bah F.B Passah, Assistant Legal Aid Defence Counsel.
Ha kane ka prokram la pyni ruh ïa ka phlim lyngkot halor ka Nasha Mukti Bharat Abhiyaan, la don ruh ka jingpyni ïa ka jingïalehkai skit da ka SURE, ka jingshim soskular bad ka free health checkups and tuberculosis (TB) screening da ka tnad jong ka koit ka khiah.
Kum shi bynta na ka jingrakhe kaba 10 sngi naduh ka 17 tarik u June haduh ka 26 tarik u June ka ophis District Social Welfare kala pynlong shibun tylli ki prokram bad ki jingïakop ban pynsngewthuh ïa ki riew paidbah khamtam ïa ki samla halor ka jingma ka jingpyndonkam ïa u drug bad ruh ban pynlong ïa ka jingim kaba lait na u drug.
Ia ka jingkrenpdiang la ai da ka kong Y. Najiar, ïa ka jingïalang la pynïaid da u H. Laloo, Supervisor of Social Welfare Department, Jowai bad ïa ka jingkren aikhublei la ai da u Rev. H. Lyngdoh, Secretary SELD Mookaiaw.
