Ka Jaintia National Council (JNC) Central Body ka la wan ban kynduh ia u MLA ka Khliehriat u Ma Kyrmen Shylla uba dei ruh u Adviser ka tnad Mining & Geology jong ka Sorkar Jylla ban pynpaw ha u haba iadei bad ka MEPRF Meghalaya Environment Protection & Restoration Fund hadien ba ki paidbah kiba lah shah ktah na ka jingkhang tih Dewïong ha ka NGT ki khlem pat ioh kano kano ka lad jingiarap na ka MEPRF.
Haba kren sha ki lad pathai khubor u President ka Jaintia National Council u bah Sambormi Lyndoh u la ong hadien ba ka NGT ka la khang ban tih Dewïong ha u snem 2014 ka don ka lad jingiarap ia kito kiba shah ktah na u Dewïong ba la tip kum ka Meghalaya Environment Protection & Restoration Fund (MEPRF) bad kumjuh ia kito ki jaka kiba la shah ktah na u Dewïong hynrei kaba sngewsih ka long haduh mynta ruh kim ioh jingiarap ei ei na kane ka skhim.
Nalor kata u la ong hadien ba ka Seng ka la pyrshang ban wad da ka RTI Right to Information hynrei kaba sngewsih ka long ba kam don kano kano ka record haba iadei bad ka Meghalaya Environment Protection & Restoration Fund bad u la ong ba kumba 400 klur ka pisa ka don hynrei shi tyngka ruh ki paidbah ki khlem pat ioh kano kano ka jingiarap hadien ba ka NGT ka la khang ia ka jingtih Dewïong.
Kumta na ka liang u Bah Sambormi Lyngdoh u la ong ba ka Seng ka kyntu bad kyrpad ia ka Sorkar lyngba u MLA bad Adviser ka Mining & Geology Department ka Sorkar Jylla ba un shimkhia bad ban leh survey ha ki district ia kito ki longïing longsem kiba la shah ktah na u Dewïong bad ba kan ai jingiarap ia kito ki paidbah kiba la shah ktah na u Dewïong lyngba ka MEPRF.
Khatduh u la ong 400 klur ka pisa ka don ha kane ka MEPRF hynrei shi tyngka ruh kam don ha ka rekod la ka tnad Mining ka la dep ai jingiarap ne em ia ki paidbah kiba la shah ktah na ka jingkhang tih Dewïong.
