Mynta ka sngi u Myntri Rangbah ka Jylla u Conrad K Sangma u la hiar sha ka shnong Sohkha, West Jaiñtia Hills District na ka bynta ban buh ïa u maw nongrim ban sdang tei noh ïa ka ïingskul ba thymmai jong ka Sohkha Government Higher Secondary School, ha ka prokram kaba la pynlong na ka bynta ka jingsam khusnam ba 17 jong ka All Sohkha Development Committee (ASDC), ha shnong Sohkha.
Ha kane ka prokram la ïadon ryngkat lang ruh u Myntri ba dei peit ïa ka tnad pule puthi u ma Lahkmen Rymbui, u MLA ba rim ka thaiñ u ba dei ruh u Vice Chairman ka Forest Development Corporation ka Jylla u ma Stephanson Mukhim, u Myntri ba peit ia ka kam ïalehkai u ma Wailadmiki Shylla, u Deputy Commissioner ka West Jaiñtia u Abhinav Kumar Singh, IAS, u SP Jagpal Singh Dhanoa, IPS, ki ophisar sorkar, ki nongïalam shnong, ki nonghikai, ki khynnah skul bad ki riew paidbah.
U Myntri Rangbah haba ai jingkren ha kane ka prokram nyngkong eh ula ai khublei ïa ki khynnah skul kiba la ïoh ïa ka lad ban shah pynkup burom halor ka jingjop jong ki. Ha ka juh ka por u la ai mynsiem ruh ïa kito ki samla ki bym shym la poi sha kane ka thong da kaba ong ba baroh ki samla ki long ryngkat ha khmat ka sorkar. U la ong ba ka pule puthi ka long kawei na ki bynta ba kongsan tam ba ka sorkar jylla ka la shim, namar ka jingkynshew ha ki briew ka long ka jingkynshew kaba don jingmut kaba ka imlang ka sahlang ka lah ban leh. Da kaba pynkynmaw ruh ïa kaei kaba u kpa jong u, u (L) Purno A Sangma ula ju kren ha u shaphang jingsynshar bad jingkynshew kaba kongsan ha ki briew kiba dei ki nongshong shnong jong ka jylla, kaba long ka jinghikai ïa u haduh kine ki por ba u la long u nongïalam ka jylla.
U ong ba ki skul ki dei ki jaka kynshew kiba mynta kum ka jingsdang ka ban pynlong pat ïa ka nongrim kaba khlaiñ ïa ki jaka pule ka jylla ha ki por ki ban sa wan. U Myntri Rangbah u pynkymaw ruh ïa jingkiew jong ka nongbah Hyderabad ka ba long ka nonglamkhmat jong ka ri India ha ka liang ka Information Technology bad ha ka Pharmaceuticals, da kaba pynkynmaw ba kane ka urlong hadien da ki phew snem ka jingnoh synniang jong ka sorkar ban kyntiew ïa ka pule puthi hapoh katei ka nongbah.
Hadien ka jingai jingkren na ka liang jong u Myntri Rangbah u la leit ban plie ïa u Mawmarbel kum ka dak ban sdang tei noh ïa ka ïingskul ba thymmai jong ka Sohkha Government Higher Secondary School.
Kiwei de ki nongkren ba kongsan ha kane ka prokram ki ki long u ma Lahkmen Rymbui, ma Wailadmiki bad u ma Stephanson Mukhim.
Ha kane ka sngi pynkup burom ïa ki khynnah kila don haduh 132 ngut kynthup lang kiba pass ïa ka SSLC bad HSSLC hadpeng u snem 2021 bad 2026. Na kine 67 ngut ki dei kiba poi ha ka kyrdan Fist Division ha ka SSLC, 57 ngut ha ka HSSLC (Arts)) bad 8 ngut ha ka HSSLC (Science).
Kham ha shwa jong ka prokram la ïoh ïa ka jingkren pdiang da u Chairman ka All Sohkha Development Committee uba la ai ruh ïa ka history lyngkot jong ka skul. La don ruh ki prokram tynrai ba la shim bynta da ki samla pule bad ki nongshong shnong.
